Nuna allanngutsaaliugaq ukiut 50-it sinnerlugit ingerlaneranni siulleq pilersinneqalersoq
Qeqqata Kommuniata, Kommune Qeqertallip Namminersorlutillu Oqartussat qanimut suleqatigiillutik kitaani nuna allanngutsaaliugaq sumiissanersoq aalajangerpaat. Kalaallit Nunaanni nuna allanngutsaaliukkamik ukiut 50-it sinnerlugit pilersitsisoqarnikuunani maanna peqalertussanngorpoq.
Nunap allanngutsaaliukkap kalaallisut taaguuserneqarnissaa siullertut sulissutigineqassaaq, innuttaasullu atsiinissamut unammisinneqangajalerlutik.
Assi: Avatangiisinut naalakkersuisoqarfik.
Avatangiisinut naalakkersuisoqarfik Kitaani nunamik allanngutsaaliukkamik ataasinngornermi juunip aallaqqaataani pilersitsissaaq. Tamanna Qeqqata Kommunia Kommune Qeqertalillu, tamarmik nunamik allanngutsaaliukkamik peqartut, suleqatigalugit pivoq.
Ukiut 50-it sinnerlugit ingerlaneranni Kalaallit Nunaanni siullerpaamik nunamik allanngutsaaliukkamik nutaamik pilersitsisoqassaaq.
Sumiiffimmi pinngortitap nunallu kinguaariinnut tulliuttunut allanngutsaaliorneqarnissaa, innuttaasut sumiiffimmi atuinerminnik nalinginnaasumik ingerlatsiinnarnissaannut periarfissanik qulakkeerinnissaaq, taamatullu takornariartitsinerup najukkani inuiaqatigiinnut iluaqutaasumik ineriartorsinnaanissaa siunertarineqarpoq.
- Kalaallit Nunaata kitaani Nunap Allanngutsaaliukkap pilersinneqarnera,
pinngortitami immikkut ittut nalillit illersorneqarnissaat maanna
pilersinneqarneranut kinguaariinnut iluaqutaasussaq alloriarfiuvoq
pingaarutilik. Nuna Allanngutsaaliugaq, Kalaallit Nunaata pilersitaa, qulakkeerneqarpoq
innuttaasut ileqqoreriikkamisut sumiiffimmik ornittakkaminni atuiinnarsinnaanerinik,
tamatumalu peqatigisaanik najukkani ineriartornissamut piujuartitsiviusumillu
takornariartitsinissamut periarfissanik nutaanik pilersitsissaagut, avatangiisinut, pinngortitamut, nukissiuutinut ilisimatusarnermullu naalakkersuisoq Jørgen Rosbach (D) oqarpoq.
Innuttaanut suliniummut peqataatinneqartut
Nunap allanngutsaaliukkap pilersinneqarnissaanut piareersaatit Kommune Qeqertalimmit, Qeqqata Kommunianit aamma Wild Nature Foundationimit 2020-mi aallartinneqarput. Naalakkersuisut EU-mi Grøn Vækst-programmimit tapiiffigineqarnerminni nuna allanngutsaaliugaq pillugu suliassat annersaannut aningaasalersuinissaq qulakkeerpaat. Kommunini innuttaasut suliniummut peqataatinniarlugit ukiut ingerlaneranni ataatsimiitinneqartarput.
- Nunatsinni Nuna Allanngutsaaliugaq, Kalaallit
Nunatsinni pinngortitami immikkut ittumik nalillit asseqannginnersaasa
illersorneqarnissaannut iluaqutaanissaa, tamatumalu peqatigisaanik sumiiffiup
kinguaariinni tulleriinni piniarnikkut aalisarnikkullu atuisarnerattut
nalinginnaasumik innuttaasut atuisinnaanissaata eqqarsaatigineqarnissaa Qeqqata
Kommuniata pingaartissimavaa, Qeqqata Kommuniani borgmesteri Malik Berthelsen (S) oqarpoq.
Kommune Qeqertalimmi borgmesterip suliniummut peqataasut arlallit pinngortitamut inunnullu pitsaanerpaamik atugassaqartitsiniarlutik suleqataasimasut nuannaarutigai. Ilaatigut ilisimatusartut piniartullu nunap immikkoortuanik, maanna allanngutsaaliukkatut pilersinneqartussami, ilisimasaqarnerulernissamut ikiuutaasimapput.
- Uatsinnut pingaaruteqarluinnarsimavoq, innuttaasut
ilisimasaat tusaaneqarnissaat kisiat pinnagu kisiannili aamma inaarutaasumik inerneranut
piviusumik sunniuteqarsimallutik qulakkeernissaa, taamaalilluta nuna
allanngutsaaliugaq, sumiiffiup maanna siunissamilu nalinginnaasumik
atorneqarnissaanik eqqarsaateqarfiusussaq qulakkeerniassagatsigu, Kommune Qeqertalimmi borgmesteri Simigaq Heilmann (D) oqarpoq.
Pingaarnertut pingasut pineqartut
Kalaallit Nunaata kitaani nuna allanngutsaaliugaq Kangerlussuup Qeqertarsuullu Tunuani sumiiffimmi annertuumiippoq.
Nunami Allanngutsaaliukkami siunertat pingaarnerit pingasut:
- Uumassusillit assigiinngisitaarnerinik, nunatani asseqanngitsunik,
uumasunik, pinngortitap pissusianik kulturikkullu eqqaassutissanik
illersuinerup ingerlaannarnissaata qulakkeerneqarnissaa
- Najugaqartut sumiiffimmik atuisinnaanerisa, tassungalu ilanngullugu
aallaaniarnermik, aalisarnermik, nuniannermik ileqquusumillu sulianik allanik
piujuartitsinissaq tapersersuinissarlu
- Piujuartitsiffiusuik takornariartitsinissamut periarfissanik, najukkani
innuttaasunut, takornariartitsisartunut aamma inuiaqatigiit
aningaasaqarnerannut iluaqutaasumik nukittorsaaneq
Piniarfiup nalaani innuttaasunut piniarfiusinnaasoq aamma nassuiaatigineqarpoq.
Nunap allanngutsaaliukkap kalaallisut taaguuserneqassaaq suliassat siulliit ilagaat, innuttaasullu taaguusiinissamut unammisinneqangajalissasut, avatangiisinut naalakkersuisoqarfik paasissutissiivoq.