Nuna tamakkerlugu qillikkanut toqqorsik ammarneqarpoq
Kalaallit Nunaanni nutaaliaanerpaamik qilleriviit toqqorsiviannik peqalerpoq, tassanilu ilisimatusarnermi inuussutissarsiornermilu ilisimasat katersorneqassapput.
Inuussutissarsiornermut, aatsitassanut, nukissiuuteqarnermut, inatsisinik atuutsitinermut naligiissitaanermullu naalakkersuisoq Naaja H. Nathanielsen nuna tamakkerlugu qilleriviit toqqorsiviata nutaap atoqqaartinneqarnerani qilerniusamik qiorsivoq.
Assi: Naalakkersuisut
Kalaallit Nunaanni qillikkanut toqqorsivik siulleq, Qillikkanut Toqqorsivik, tallimanngornermi februaarip 13-ianni atoqqaarfissiorneqarpoq. Qillikkat meterit hunnoruju tuusintilikkaat nakkutigineqartumik sumiiffimmi ataasiinnarmi toqqorsivimmi nutaami katersorneqassapput.
Toqqorsiviup Kalaallit Nunaata nunataa pillugit ilisimasat katersersorneqarlutillu toqqorterneqassapput, ilisimatusarnerlu pitsanngorsarlugulu inuussutissarsiornermi suliniutit ingerlannissaat ajornannginnerulersissallugit.
Toqqorsivik Kalaallit Nunaanni aatsitassarsiornerup ineriartorneranut naapertuuttumik alliartortussatut ilusilersorneqarsimasoq, naalakkersuisoq Naaja H. Nathanielsen (IA) oqarpoq:
- Naalakkersuisut neriuutigaat, Qillikkanut Toqqorsivimmut atugassarititat ullut arlaanni mikivallaalissasut, taamaalilluta allilerisariaqalerluta. Tassami toqqorsivimmut tunngatillugu aatsitassarsiornermut suliassaqarfimmi suliaqarnerit takuneqarsinnaasussaapput.
- Suliaqarfimmi ingerlatat takusagut qillikkanut toqqorsivitsinni takuneqarsinnaasussaapput, taamaalilluta piffissap suliaqarfiusup kingorna qillikkat amerlisimanerat takusartussaallutigu, aatsitassanut, nukissiuuteqarnermut, inatsisinik atuutsitsinermut naligiissitaanermullu naalakkersuisoq Naaja H. Nathanielsen oqarpoq.
Qillikkat tamarmik Kalaallit Nunaata nunataani asseqanngitsuneersuupput
Qillikkat nunap iluaniit misissugassatut tigusaapput, soorlu aatsitassanik misissuinermut atorneqartarlutik.
Ingerlatseqatigiiffiit misissuisut akuersissutip atorunnaarnerani imaluunniit utertinneqarnerani qillikkanik Namminersorlutik Oqartussanut tunniussinissamik inatsisitigut pisussaaffigaat.
Qilleriviit tamarmik immikkut Kalaallit Nunaata nunap sananeqaataanik ineriartorneranik, silap pissusaanik kiisalu aatsitassanik, saffiugassanik pisuussutinillu allanik pingaarutilinnik nassaarnissamik atorluaasinnaanermillu paasissutissanik naleqangaartunik imaqarput, Naalakkersuisut ilisimatitsipput.
