KL

DK

Nunanut allanut timmisartumik angalasut, 12 procentimik ukiup affaani siullermi amerleriarput

Timmisartumik ilaasut nunanut allanut angalasut 2026-mi januaarimiit juunip tungaanut 49.160-iupput.

Nuup mittarfiani, nunanut allanut timmisartumik angalasut ukiup affaani siullermi amerleriarput.
Thomas Munk Veirum Tusagassiortoq
Saqqummersinneqarpoq

Nuuk aqqusaarlugu, nunat tamalaat akornanni silaannakkut angallanneq 2026-vap affaani siullermi annertuvoq.

Tamanna Naatsorsueqqissaartarfiup nunanut allanut timmisartumik angalasartut pillugit naatsorsuinerani erserpoq.

Timmisartukkut angalasut 2026-mi januaarimiit juuni ilanngullugu 49.160-iupput, tassa ukiumut 2025-mut sanilliullugu 12,3 procentimik amerlanerupput, Naatsorsueqqissaartarfik saqqummiussamini nutaami allappoq.

Takussutissami ataani takuneqarsinnaavoq, timmisartoqarfinniit ilaasut agguataarneqarnerisa nalunaarsorneqarnerat. Ilaasut amerliartornerat eqqarsaatigalugu Nuuk ineriartorfiunerpaavoq, Kulusummili mittarfik piffissami killilimmi ilaasut amerliartorneranut peqataalluni.

Kangerlussuarmi, Ilulissani, Nerlerit Inaanni Narsarsuarmilu mittarfiit tamarmik kinguariarput.

Narsarsuarmi nunanit allanit ilaasut ikilisimapput. Danmarkimit timmisartoq kingulleq siorna septembarimi aallarpoq, tamatumalu kingorna sukkanerusumik angalasoqartalersimavoq.

Nuummili mittarfimmi nunanut allanut angalasut 6.583-inik amerleriarsimapput, tassa ukiup siulianut sanilliullugu 17,5 procentimik amerleriaateqarlutik.

Qaammatit ataasiakkaarlugit misissuataariaraanni marsimi juunimilu ilaasut amerlanerpaajupput.

naatsorsueqqissaartarfik nuuk mittarfiit inuiaqatigiit ilaasut amerleriartut nunanut allanut timmisartumik angalaneq

Atorfiit tamaasa takukkit

PODCASTI

Powered by Labrador CMS