Nunap karsianut nutaarsiassaq nuannersoq: Aningaasat millionillit

Naalakkersuisut Namminersorlutik Oqartussat aningaasaqarniarnerat pillugu missingersuummik nutartikkamik saqqummiusseqqammerput. Nutartikkami juunimi qanoq inissisimaneq saqqummiunneqarpoq, nunallu karsianut tamanna pitsaasumik nutaarsiassatsialaavoq.

aningaasanut inatsimmi 2026-mut missingersuutigineqarpoq, DAO 40,5 million koruuninik amigartooruteqassasoq, missingersuutilli nutartikkat takutippaat nunatta karsia 67,7 million koruuninik sinneqartooruteqassasoq. Tassa 108,1 million koruuninik inerneqassasoq.

Naalakkersuisoqarfik erseqqissaavoq suli annertuumik nikingasartoqarsinnaasoq, ingammik akileraarutinut soraarnerussutisianullu tunngatillugu.

Aatsitassarsiornermi erniaqartitsinermut akitsuutinik 120 million koruuninik aamma nunami akileraarutinik 25 million koruuninik amerlanerusunik isertitsinissaq naatsorsuutigineqarnera, aningaasanut missingersuummi pitsanngorsaanermut ilaatigut pissutaavoq.

Aammattaaq eqqussinermi akitsuutinit 21,1 million koruuninik aamma soraarnerussutisiaqalernermi akileraarutinit 13,5 million koruuninik isertitaqarnissaq naatsorsuutigineqarpoq.

Aningaasaqarnermut naalakkersuisoqarfiup naatsorsuutigaa EU-mik suleqateqarnermut isumaqatigiissummit 125 million koruuninik isertitakinnerunissaq. Aningaasanut inatsimmi 2026-mut missingersuutigineqarpoq, EU-mik suleqateqarnermi isumaqatigiissummit katillugit 267 millionit koruuninik isertitaqartoqassasoq.

Aningaasaqarnermut Naalakkersuisoqarfik nutartikkami allappoq EU-p aningaasaliissutaasa assigiinngissutaat annertuut pingaarnermik tapiissutit ilaasa aalajangersimanngitsut tunniunneqarnissaata kinguartinneqarneranik pissuteqartoq.

Aningaasanik katersugassaqarnerup tungaatigut aamma pitsanngoriartoqarpasippoq siorna septembarimi 56 millionit koruuninik, ikinnerujussuulluni. Apriilimili aningaasat katersukkat annertusiartupiloorsimapput, juunimilu 918,1 millionit koruuniupput, 2025-milu piffissami tamatumani 737,7 millionit koruuniullutik.