Nutartigaq: USA-mik isumaqatigiissut qassinut atsiorneqassanersoq Naalakkersuisut ilisimatitsissutigaat

Allaaserisap naanerani nutarterinermi ilassut atuarneqarsinnaavoq

Naalakkersuisut tallimanngornermi unnukkut nalunaarput, USA Danmarkilu isumaqatigiissummik atsioqatiginissaat sapaatip-akunnerata ingerlanerani naatsorsuutigineqartoq.

Naalakkersuisut Facebookiminni maanna uppernarsaapput USA-mik isumaqatigiissut Naalakkersuisut siulittaasuata Jens-Frederik Nielsenip (D) marlunngornermi nunatta nallunaaqutaa malillugu nal. 13.30 atsiussagaa.

Oqaatigineqarportaaq ministeriuneq Mette Frederiksen, Naalakkersuisut siulittaasuat Jens-Frederik Nielsen USA-llu præsidentia Donald Trump isumaqatigiissut atsiorniarlugu naapikkumaartut.

- Atsioqatigiinneq piffissami unammillernartumi pivoq, innuttaasut amerlasuut ernumallutik ukiuni kingullerni pisut malinnaavigisimavaat. Atsioqatigiinnissarput qilanaaraara, soqutigisagut, illersorneqarnerput kiisalu Nunatta ataqqineqarluni pineqarnissaa qitiutillugu alloriarfigisussanngoratsigu, Jens-Frederik Nielsen Facebookimi allappoq.

FN-ip ataatsimeersuarneranut atatillugu atsioqatigiinnerit pissapput.

Nutartigaq

Atsiorneq USA-mit marlunngornermi ullaakkut uppernarsarneqarpoq.

Donald Trumpip pisortatigoortumik ullorsiutaani maanna takuneqarsinnaavoq, Danmarkip ministeriunerata aamma Kalaallit Nunaata naalakkersuisuisa siulittaasuata atsioqatigiinnerannut nal. 10.40 peqataassasoq, tassa nunatsinni nalunaaqutaq malillugu 13.40.