Oqaluttuarisaanermi pingaarutilimmik qulaajaanissami suliniummut pilersaarut naammassineqarpoq

Kalaallit Nunaata Danmarkillu sorsunnersuup kingulliup kingornali attaveqatigiinnerat maanna misissorneqassaaq.

Tamanna danskit kalaallillu naalakkersuisui oqaluttuarisaanermik qulaajaanissamik aallartitsissallutik 2022-mi isumaqatigiissutigaat.

Suliniummut pilersaarut maanna naammassineqarpoq.

Ilisimatusarfik tusagassiutitigut nalunaarummi allappoq.

Suliniummut pilersaarummi suliniutit sisamat ataatsimut katersorneqarput. Tassani meeqqat meeravissiartaarineqartarneri tamatumalu kinguneri misissorneqassapput; inuit inatsisitigut ataataqanngitsutut peroriartorsimasut misigisaat; atuarfiup oqaatsinut kinaassutsimullu sunniutai, kiisalu ilaatigut inoqarfiit matuneqarnerat, innuttaasut nuuttarneri suliffissanillu neqeroorutiginnittarnerit inunnut inuiaqatigiinnullu qanoq sunniuteqartarnerat.

- Suliniutit sisamat pingaarnerit aallartippavut, taakkualu tamarmik aalajangernerit aalajangersimasut taakkualu kinguneri pillugit paasissutissiipput. Aammattaaq piffissap ingerlanerani assigiinngitsunik pissuteqartoqarneranik paasinninnissamut iluaqutigisinnaavavut — soorlu atuarfiup, najugaqarfiup, suliffiup inuillu inuunerminnik ilusilersuisinnaanerisa imminnut attuumassuteqarnerat paasiniarlugu, misissuinermi pisortaq Tenna Jensen oqarpoq.

Innuttaasunik peqataatitsineq pingaartinneqartoq

Ilisimatusarfimmi suliniut Oqaluttuarisaanermi Qulaajaaneq ingerlanneqarpoq, taannalu universitetip digitalikkut attaveqaataanik isumannaatsumik ineriartortitsineranut, allaffissornermik ingerlatsineranut aamma Kalaallit Nunaata Danmarkillu akornanni ilisimatusarnikkut suleqatigiinnermut tapersersuineranut ilaavoq.

- Issittumi universitetitut Ilisimatusarfik ilisimatusarneq ilutigalugu ineriartorpoq. Periutsit piginnaasallu oqaluttuarisaanermik misissuinermi ineriartortittakkavut ilisimatuunut ilinniartunullu maannakkut iluaqutaalereerput, suliniutillu naammassinerata kingorna universiteti nukittorsarlugu, rektor Mari Kleist oqarpoq.

Oqaluttuarisaanermik Qulaajaanermi ilisimatusarnermut aqutsisut, tassaasut Daniel Thorleifsen aamma Tenna Jensen februaarimi 2024-mi toqqarneqarput, immikkut ilisimasallit suleqatigalugit misissuinerup immikkoortuini suliniutit taamanimiilli nassuiarneqarput – Ilisimatusarfimmillu suleqateqarluni suliniummik allattoqarfik ineriartortinneqarpoq pisariaqartunillu attaveqaatit pilersinneqarlutik.

- Oqaluttuarisaanermi allakkat aalajangiinerit pillugit paasissutissiisarput, inuillu oqaluttuaat aalajangiinerit qanoq misigisimaneqarnersut ulluinnarnilu qanoq sunniuteqartarnersut pillugu paasissutissiipput. Suliami matumani mianerisassami taakku marluk pisariaqarput, taamaattumillu innuttaasunik peqataatitsineq suliniummut tamarmut pingaaruteqarpoq, ilisimatusarnermi pisortaq Daniel Thorleifsen oqarpoq.

Misissuineq ukiuni tallimani ingerlanneqassaaq, misissuinerlu Danmarkimit 45 million koruuninik aningaasalersorneqarpoq.