Oqartussat arlallit innaallagiaarunneq pillugu Facebooki kisiat aqqutigalugu innuttaasunut paasissutissiisaartut

Nuuk arfininngormat unnukkut nalunaaqutaq 22.30 missaani tamarmi innaallagiaaruppoq. Innuttaasut 20.000-it tarrajuup ataaniileriasaarput.

Naalakkersuisut innuttaasut ajornartoornermi qanoq iliornissaannut najoqqutassiap nutaap saqqummiunnerannit ullualuit qaangiuttut tamanna pivoq. Ulluni tallimani, ilaatigut innaallagiaaruttoqartillugu, imminut napatissinnaanissamut piareersimanissaq siunertarineqarpoq. Qujanartumik Nukissiorfiit sapaatiummat ullaassakkut nalunaaqutaq 04.35 illoqarfik tamarmi innaallagissamik, imermik kiassarnermillu pilersorneqaqqilersoq nalunaarput.

Nuummili sivisuumik innaallagiaqannginneq misigineqartareerpoq. Taamaattoqartillugulu amerlasuut qanoq pisoqarnersoq paasiniarlugu paasissutissanik amigaateqartarput. Oqartussat arlallit, soorlu Kalaallit Nunaanni Politiit aamma Kommuneqarfik Sermersooq Facebook aqqutigalugu paasissutissiisaqattaartarput, tamannalu ajornartorsiutaasoq tusagassiorfimmi Sermitsiami pisortaaneq aaqqissuisuunerlu Masaana Egede oqarpoq.

- Ajutoortoqartillugu oqartussaasut amerlasuut Facebooki kisiat aqqutigalugu attaveqarniartarnerat isornartoq isumaqarpunga. Paasissutissanik siammarterisoqapallassinnaanera atorneqarneralu apeqqusinngilara, taannaliuna kisiat aqqutigalugu paasissutissiisoqartarnera piginga, oqarpoq.

Kikkut tamarmik Facebookeqanngitsut, innuttaasullu tamarmik paasitinneqarsinnaasariaqartut, Masaana Egede oqarpoq.

Akunnerit pingasut qaangiuttut radiukkut nalunaarutit

KNR innuttaasunik kiffartuussisutut upalungaarsimanermut ilaavoq. Taamaattumik inuppassuit paasissutissaqarnersut paasiniarlugit KNR alakkartarpaat. Taamaakkaluartoq Kalaallit Nunaanni Upalungaarsimasoqatigiit imaluunniit Kalaallit Nunaanni Upalungaarsimanissamut Ataatsimiisitaliaq sulisinneqanngitsoq, Naalakkersuisut tugassiuutitigut nalunaarummi allapput.

KNR-ip Facebookimi quppernini aallaqqaammut paasissutissanik siammarterivigaaa. Tassani nalunaaqutaq 23.12-imit 04.39-p tungaanut Nukissiorfinnit innaallagiaaruttoqarneranik nutaarsiassat arfineq-marluk saqqummiunneqarput.

Nittartagaanili ataasiinnarmilluunniit allaaserisamik soqanngilaq. Innaallagiaarunneq pillugu allaaserisaq ataasinngornermi nalunaaqutaq 11.30 saqqummerpoq.

KNR-ili Sermitsiamut allakkatigut akissuteqarnermini ilisimatitsivoq minutsit 15-ikkaarlugit radiokkut nalunaaruteqartarsimallutik.

Siulleq nalunaaqutaq 01.32 pivoq — tassa innaallagiaaruttoqarneranit akunnerit pingasut qaangiuttut — kingullerlu innaallagiaqaqqilernerata kingorna ullaassakkat nalunaaqutaq 05.02 pivoq.

KNR-imiit nittartagartik pinnagu Facebookikkut paasissutissiisarneq sooq pitsaanerunersoq akissutissaqartinngilaat. Upalungaarsimanissamut Ataatsimiititaliamut innersuussipput.

Facebook kisiartaanngilaq

Facebooki paasissutissanik siammarterivittut atorneqarnera allani aamma atuuppoq. Kommuneqarfik Sermersooq innaallagiaaruttoqarnerani Facebookimi quppernermini arfinileriarlutik nalunaaruteqarpoq, nittartakkaminnili paasissutissanik saqqummiussinatik.

Taakku innaallagiaaruttoqartillugu innuttaasunik paasissutissiineq Nukissiorfiit akisussaaffigaat, pisariaqaraangalli kommuni paasissutissanik ingerlatitseqqiisartoq, Sermitsiamut allapput.

- Facebook kommunimi innuttaasunit atorneqarnerpaat ilagaat, ingerlatsinermilu paasissutissanik kiffartuussinermilu nalunaarutinik siammarterivittut atortarparput.

- Imaanngilarli Facebook kisimi attaveqaataasoq, oqartussaasulli allat paasissutissiissutaannik sukkasuumik siammarteriffissatsinni innuttaasorpassuit anguniarlugit taanna periaaseraarput, immikkoortortaqarfimmi pisortaq Rasmus Christiansen allappoq.

Kommunip upalungaarsimanera sulisinneqalersimasuuppat, assersuutigalugu kialaarfinnik ammaanerani, ajornartoortoqarnerani biiliussinissamut kommunillu upalungaarsimaneranut tunngasunik allanik suliaqarnermut atatillugu, tusagassiuutitigut immaqalu radiokkut aamma nalunaaruteqarsimassagaluarnertik ilanngullugu paasissutissiissutigaa.

Naalakkersuisut misigisaq ilinniutissatut tigugaat

Naalakkersuisut sapaatiummat unnuami innaallagiaaruttoorneq upalungaarsimanermut misiliutaasoq ataasinngormat tusagassiuutitigut nalunaarummi allapput.

- Oqartussaasut pisoqartillugu pilertortumik sulisinnaasut eqaatsumillu ataqatigiissaarisinnaanerannik takutitsivoq. Nalitsinni sukkasuumik eqqortumillu paasissutissiinissaq immikkut pingaaruteqarpoq isornartorsiuinerillu ataasiakkaat akuersaarpagut, pisumik naliliinissatsinni siunissami pitsaanerusumik iliuuseqarnissamut iluaqutaassammata, aalisarnermut, piniarnermut nunalerinermut, imminut pilersornermut avatangiisinullu naalakkersuisoq Peter Borg (D) oqarpoq.

Inuussutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu naalakkersuisup Naaja H. Nathanielsenip (IA) Nukissiorfiit sukkasuumik sulinerat suliaminnillu ilisimasaqarluarlutik iliuuseqarnerat nersualaarpaa.

- Nukissiorfiit ataavartumik innuttaasunik Facebookikkut paasissutissiisarput unnuallu qeqqata missaanniit namminneq nittartagartik aqqutigalugu. Erseqqippoq siunissami pisoqartillugu paasissutissiinerit inooqatigiinnut tusagassiorfiit kisiisa aqqutigalugit nalunaarutigineqartassanngimmata aammali oqartussaasut namminneq nittartagaasigut pisassallutik, oqarpoq.

Anorlingaatsiarnera innaallagiaarunnermut pissutaasoq

Nukissiorfiit nittartakkaminni unnuap qeqqata missaani paasissutissiipput. Nittartagaq qarasaasiamut attaveqarneq akornuserneqarmat kinguaattoorfiusimasoq Sermitsiamut ilisimatitsissutigaat. Facebookikkut nalunaaqutaq 23.01-imiit paasissutissiisaqattaarnerat aallartippoq.

- Kikkut tamarmik Facebookeqannginnerat eqqumaffigaarput. Taamaammat paasissutissat nittartakkatsinni aamma takuneqarsinnaasariaqarput, Nukissiorfimmi pisortaq Johan Danielsen Sermitsiamut allakkatigut akissummini allappoq, nangippoq:

- Unnuap ingerlanerani illoqarfimmut attaveqarneq pilersinneqarpoq. KNR Radio aamma ilanngunneqarpoq. Tamannalu pitsaasuuvoq, innuttaasummi tungaanut internettimut Facebookimullu attaveqanngitsut Nuummi pilersuinerup aaqqeqqinnissaata tungaanut pisumut malinnaasinnaanngormata.

Attaveqaat ippassaq misissorneqarsimasoq, innarlersimaneranilli takussutissaqanngitsoq paasissutissiivoq. Arfininngormat kangisimmit anorlingaatsiarnera qamittoornermut pissutaagunarpoq, tamatumami kingunerisaanik aqqutit marluk imminnut ima qanitsigilersimapput innaallagiaarunneranik kinguneqarluni, paasissutissiivoq.

Sermitsiap Kalaallit Nunaanni Politiit oqaaseqartinniaraluarpai, allaaserisamulli killigititap iluani akissuteqarsimanngillat.