Paaqqinnittarfimmi tillinniartoqarlunilu nalaasaarfik ikuallattoq orniguffigineqartoq

Tasiilami meeqqerivimmut unnuaq tillinniartoqarsimasoq, politiit marlunngornermi ullaakkut nalunaaqutaq 08.10 nalunaarfigineqarput.

Pigaartut pisortaat Thomas Jeppesen ullormi pisut atuarneranni taama paasissutissiivoq.

Tillinniat imaluunniit tillinniap iserniarluni igalaaq aserorsimavaa, paaqqinnittarfiullu iluani misissuisimanera takussutissaqarluni.

Puukut utertitassat 100 koruuninik naleqartut tillinneqarsimasut pigaartut pisortaat oqarpoq.

Nalaasaarfik ikuallattoq

Nuummi innuttaasup qatserisarfiup saavani nalaasaarfimmik ikuallattoqarnera takusimallugu politiinut ulloqeqqata kingorna nalunaaqutaq 13.04 kalerriutigaa.

Qatserisartut ornigutipallallutik nalaasaarfik ikuallattoq pujulioqisoq qamippaat.

Politiit nalaasaarfiup piaaraluni ikuallanneqarsimanera pasitsaatinngilaat.

Nuummi mittarfimmi ilanngaaserisut angalasut ilaannik uninngatitsigallarlutik, politiinut nalunaaqutaq 15.09 nalunaarutigaat. Angalasut kuffertia qimmip ikiaroornartunik ujaasisartup qisuariarfigisimammagu taamaaliortoqarpoq.

Kuffertimi tassani ilanngaaserisut hashi annikitsoq amigissaatinut toqqorneqarsimasoq nassaaraat.

Arnaq angalasoq tigusarineqarpoq, killisiorneqareerlunilu iperagaalluni. Pisumi unnerluutigineqarpoq.

Nanortalimmi containeri ikuallattoq

Oqartussat Kujataani ikuallattumut allamut aamma orniguttariaqarsimapput. Nanortalimmi qatserisartut qatserutaasiviup qanitaani ikuallattoqartoq nal. 16.02 namminneq nalunaarutigaat.

Containeri kingoraartissaasivik ikuallattoq paasineqarpoq.

- Sumiiffimmi tassani ikitsit pappiaqqallu nassaarineqarput, takunnittullu inuusuttut/meeqqat sumiiffimmiit qimaasut takusimavai, Thomas Jeppesen oqarpoq.

Politiit meeqqat innermik pinnguarsimassasut, taamaalillutillu containeri ikuallalersimasoq ilimagaat.

- Pasisaqanngilagut, takunnissimasinnaasullu tusarfigerusullugit, pigaartut pisortaat oqarpoq.

Nuummi biilertut marluk unnuaq unitsinneqarlutik imigassartortoqarsimaneranut uuttuummut suputinneqarsimasut pigaartut pisortaata aamma oqaatigaa. Taakku imigassartorsimanermut killigitaq qaangerlugu imigassartorsimallutik biilertutut tigusarineqarlutik unnerluutigineqarput.