Pakistan: Iranimit USA-millu aallartitat eqqissinissaq pillugu Sapaatip-akunnerani matumani isumaqatigiinniassapput

USA-mit Iranimiillu aallartitat eqqissinissamik isumaqatigiinniarniarlutik tallimanngorpat Pakistanimut tikissapput.

Nutaarsiassaqartitsivik Reuters naapertorlugu Pakistanimi ministeriuneq Shehbaz Sharif pingasunngornermi taama oqarpoq.

Pakistanimi eqqissinissamik „qanittukkut“ isumaqatigiinniartoqassasoq USA-p præsidentiata Donald Trumpip aviisimut New York Postimut aamma uppernarsarpaa.

USA-p aallartitai præsidentip tullianit J.D. Vancemit siulersorneqassasut, Iranimiullu aallartitaat Iranip inatsisartuisa siulittaasuannit Mohammad Baqer Qalibafimit aamma nunanut allanut ministerianit Abbas Araqchimit siulersorneqassasut tusagassiivik Reuters paasissutissiisimasut marluk kinaassusersinngitsut naapertorlugit allappoq.

Trumpili J.D. Vance isumannaallisaanermut tunngatillugu aarlerinartorsiorneq pissutigalugu immaqa peqataassanngitsoq New York Postimut oqarpoq.

Reuters naapertorlugu aallartitat sisamanngorpat tikissapput.

Sharifip nunat taakku marluk tallimanngornermi eqqissinissamik isumaqatigiinniarnissanut qaaqqugai siusinnerusukkut pingasunngornerup unnuaani ministeriuneq nalunaarpoq.

Shehbaz Sharif nittartakkami inuit attaveqaqatigiittarfianni X-imi taama allappoq.

- Isumaqatigiinngissutit tamarmik aaqqinneqaqqullugit isumaqatigiissut inaarutaasumik isumaqatigiissutigineqassammat nunanit taakkunannga marlunnit aallartitat tallimanngornermi apriilip 10-ani 2026-mi Islamabadimi isumaqatiginninniaqqissapput, Sharif allappoq.

Pakistanimi ministeriunerup oqaasii naapertorlugit nunat taakkua qaaqqusissut akuersissutigaat.

Pakistanip Iran sanilerigamiuk aamma USA-mut Iranimullu attaveqarluarpoq. Pakistanittaaq isumaqatigiisitsiniartoralugu sapaatit akunnerini marlunnik sakkulersortoqassanngitsoq USA-mit Iranimiillu nalunaarutigineqarpoq. Israel isumaqataalluni tamatuma kingorna aamma nalunaaruteqarpoq.

Pakistanip Iran 900 kilometerisut isorartutigisumik killeqarfigaa. Nunat taakkua marluk oqaluttuarisaanermikkut, kulturikkut upperisarsiornikkullu ataqatigiilluinnarput. Pakistanittaaq Iranimut tulliulluni nunarsuarmi innuttaasut shiamuslimiusut amerlanersaasa tullii innuttaasorai.

- Pakistan nunani taakkunani kisiartaalluni USA-mut Iranimullu attaveqarluarpoq, Pakistanip Iranimi aallartitarisimasaa Asif Durrani AFP-mut oqarpoq.

/ritzau/