Panigiit sumiiffimmi kisiartaallutik arnani savaatillit

Asiarpa Paviasen, 28-nik ukiulik savaatilik, arnaalu Elionora Paviasen ilaqutariit Qorlortumi ukiuni kingullerni savaateqarfianni, Qassiarsummiit 6-7 kilometerisut ungasitsigisumiittoq, piginneqataaffigaat.

- Apereriassagimma, artornarsimanersoq ataatsimik ukiulimmik aamma paarineqartariaqartumik erneqarluni sakkortusimanersoq, Asiarpa Paviasen illarluni oqarpoq.

- Sakkortuvoq. Sakkortoqaaq.

Qassiarsummi cafép silataani seqinnarissumi ernini Albert siorna inunngortoq ilagalugu issiavoq. Elionora Paviasen pisulluni apissippoq, ilaliullugillu.

- Uiga Ole Paviasen peqatigalugu ukiuni 20-ni savaatiliuvugut, taanna ukiut marluk pingasulluunniit matuma siorna soraarninngorpoq, panimmalu taassuma piginnittussaatitaaneranik kingornussivoq, Elionora Paviasen oqaluttuarpoq.

Taassuma pania Asiarpa Paviasen savaatilinngornissani anguniarlugu Upernaviarsummi ilinniarsimavoq. Taassuma qatanngutini arfineq-marluk peqatigalugit savaaqqat ukiakkut qaqqamit, upernaakkulluunniit savaararniarnerit aallartikkaangata peqataajuaannartarpoq.

Savaateqarfinni amerlanerni kikkut tamarmik ikiuutaasarput.

- Ilaalli suli isumaqarput arnat niviarsiaqqallu angerlarsimaffimmiiginnartariaqartut, ataatagali taama isumaqanngilaq, Asiarpa Paviasen oqaluttuarpoq

Taamaattumik aamma panigiit suleqatigiillutik ingerlatsinerat pissusissamisuuginnarpoq.

- Tamanna sungiusimavarput.

Asiarpa Paviasenip savaateqarfik tamaat ukiup tulliuttup ingerlanerani tigussajunnarsivaa. Naak panigiit savaateqarneq nuannarigaluaraat, tamanna ilungersunarlunilu timikkut artornartuuvoq, Elionora Paviasenilu qiterlulluni ukiup kingulliup ingerlanerani ajornartorsiuteqarpoq.

- Tamakkiisumik savaateqarfimmik piginnittunngornissaanut suliaq aallartereerpoq. panini isigitillugu oqarpoq.

- Taava qanoq sussanerlunga maanna eqqarsaatigiinnartariaqassavara.