Hans Enoksenip septembarip 17-iani unnukkut qimagunnera inoqatinut attaveqaatini ingerlaartinneqalereersoq Sermitsiamiit aqaguani ullaaralaakkut uppernarsartissallugu Pele Broberg sianerfigigatsinni aliasoqisoq qularutissaanngilaq.
Naleqqamik pilersitsisup siulittaasuusimasullu qimagunnera ukioq manna kingumut qiviarniaraanni siullertut eqqaasariaqartoq partiip siulittaasua oqarpoq.
UKIOQ NAAGUJOQ
Partiit siuttuinut tamanut apeqqutit nassiussagut aallaavigalugit allaaserisanik juullip nalaani saqqummiussisassaagut.
Partiit siuttui politikkikkut pisut pillugit kingumut qiviartissavagut, ukiumi unammillernartuutaat tusagaqarfigalugit, aammali siunissamut pilersaarutaat paasisaqarfigilaassallugit.
Hans Enoksenip septembarip 17-iani unnukkut qimagunnera inoqatinut attaveqaatini ingerlaartinneqalereersoq Sermitsiamiit aqaguani ullaaralaakkut uppernarsartissallugu Pele Broberg sianerfigigatsinni aliasoqisoq qularutissaanngilaq.
Naleqqamik pilersitsisup siulittaasuusimasullu qimagunnera ukioq manna kingumut qiviarniaraanni siullertut eqqaasariaqartoq partiip siulittaasua oqarpoq.
- Siullertut Hans Enoksenip qimagunnera eqqaasariaqarpoq. Nunatsinni Hansip nipaa ersarissoq, kalaallinik illersuisoq, pissakinnernut sukataarussisoq, nunaqarfinnut isorliunerusunullu uummatilik minnerunngitsumillu nunatta naalagaaffinngornissaanik sukataarussissoq annaavarput. Ulluinnarni sulinitsinni peqannginnera malunnaqaaq – maqaasisaqaarput, Pele Broberg oqarpoq.
Ukioq una oqaatsimik ataatsimik atuilluni oqaasertalissagaanni "pisoqarfiusoq" tulluartoq Naleqqami siulittaasup oqaatigaa. Partiimi siulittaasuuffigisaa aamma pisoqarfiusimaqaaq.
- Naleraq qinersinermi marloriaammik annerulerpoq, partiit annersaasa tullerilerlugu, partiitoqqat IA aamma Siumut qaangerlugit. Naak tamanit aamma allaat Danmarkimit umerneqaraluarluta aatsaat taamak angusaqartigaagut. Siulittaasutut tamanna puigunngisaannassavara.
Suna unammillernarnerpaanikuua?
- Inuiaqatigiit atugaat artornareertigisut, suli artornarnerulertut, aningaasarliornerulertugut, aaqqiinissamullu aqqutissanik alloriarfiginnittoqarumanani. Tamanna aaqqeerusuttutut iliuuseqarusuttutullu unammillernartoq suli unammillernarnerunissaa ernumanarpoq, Pele Broberg taama ilaatigut akissuteqarpoq.
Iluatsitat angumerinngitsuukkallu
Ukioq manna suliniutigisarni suna naammassinngitsoorpiuk?
- Siunnersuuterpassuagut Naalakkersuisoqatigiit kinguartikkaat, ilai aappaagu aallartinneranut, ilai upernaamut ataatsimiinnissamut, ilaalu piffissalernagit kinguarsarneqartut, naak Inatsisartut amerlanerussuteqartut taperseraluaraat. Tamanna assut tamat oqartussaaneranut innarleeqqasut qinikkani 25 procentiinnaasuulluni demokrati eqqortumik atorneqarnissaanut sukataarluni iluatsinnaveertarnera, amerlanerussutillit imaluunniit ataasiakkaat pissaaneqarniutigalugu unitsitsiniartarnerat assut aaqqinneqannginnera pakatsissutigaara.
Suliarni suna iluatsilluarnerpaasoriviuk?
- Qinersinerit, siunnersuutigut amerlanerpaat ingerlaqqittut, inuiaqatigiinnit aammalu ilisimatusartunit allaniillu ukiorpassuarni oqaatigisartakkagut akerartugaassutigisartakkattalu mumissimaneri. Maanna malunnartumik saqqummiussagut imarisaat isumaallu akerlilersinnaanngitsutut pissusilersorfigineqartalerput, Pele Broberg taama ilaatigut akivoq.
Aamma spiralilersuinermi eqqugaasut utoqqatserfigineqarlutillu taarsiivigineqartussanngorneri taarusutaanut ilaapput.
- Illuatsilluartut aammattaaq ilagaat arnat niviarsiaqqallu pinngitaalisamik naartunaveersaasersoqarneqarsimasut pillugit ukiuni arlalinni danskit naalagaaffianut kinguneqartitsisoqarnissaanik Naleqqamiit sukataarutiginikuullugu utoqqatserfigineqarnerat taarsigassarsitinneqarsinnaanngornerallu piviusunngiulersut eqqugaasunut qutsannarpoq, naak aningaasartai annniarsimaneranut matussusiisinnaanerat annikikkaluartoq.
Suli ulapputissaqaqisut
Ukioq nutaaq aallartittussannguleraangat pilersaarutit angorusutallu qissimingaarneqakkajuttarput. Naleqqammita siulittaasuata suna pingaarnertut anguniarusuppaa?
- Qineqqusaarutitta anguniarnissaat. Uagut qineqqusaarutigut tamattaalluta ilumoorukkatsigit. Imaanngitsoq alligatta iluarisimaalerlutalu. Naagga. Anguniavippagut qineqqusaarutigut taakkualu aappaagussamut angunissat pingaarnerpaavoq, anguneqarpatami inuiaqatitsinnut tamakkiisumik iluaqutaasussaammata.
- Tassa qineqqusaarutitta angunissaat pingaarnerpaavoq, taamaammammi qinigaavugut. Takinerugunanngilaq, Pele Broberg taama naggasiivoq.
