Nunatsinni partiip Folketingimut isertitaqartup aappaata siulittaasua, Pele Broberg, sinnakikkaluarluni ullaaq manna nuannaaqaaq.
- Iggiarlulaarunarpunga ippassaq nillianikuunermik erinarsoqataanikuunermillu. Pikkusulaavissornikuugatta ippassaq unnukkut, kisianni ajunngilanga. Sininnera sivikilaaginnaraluarpoq, Pele Broberg taama oqarpoq.
Nunatsinni partiip Folketingimut isertitaqartup aappaata siulittaasua, Pele Broberg, sinnakikkaluarluni ullaaq manna nuannaaqaaq.
- Iggiarlulaarunarpunga ippassaq nillianikuunermik erinarsoqataanikuunermillu. Pikkusulaavissornikuugatta ippassaq unnukkut, kisianni ajunngilanga. Sininnera sivikilaaginnaraluarpoq, Pele Broberg taama oqarpoq.
Naleqqamik tapersersuisut siullertut qutsavigai.
- Sineriammi Naleqqamik tapersersuisimasut, ikiuussimasut, plakatilersuisimasut, pisoqartitsisullu ippassaq naammassimmat inernerit takullugit tanngassimaarutiginat. Unnuaq angerlarlunga plakaatit tamarmik peereersimasut, nuanneq taamatut ikiuuttorpassuit tamaviaarnikuusut isertitsillutalu, Pele Broberg oqarpoq.
Qinersinerup taama inerneqarnera nunatsinni politikkikkut pissutsit inissisimanerannik takutitsisoq siulittaasoq isumaqarpoq.
- Sineriammi salloqittagaanikuunertik takutippaat, iluarinngikkaat maannakkut Naalakkersuisut aqutsisinnaanngitsut takutitsiffigilaarlugit, immaqa Inatsisartuni qanoq pisoqartariaqarneranik tikkuussilaarpoq.
Qarsoq Høegh-Dam qinersinermi inuit ataasiakkaani taaguunneqarnerpaalluni 4.619-inik taaguunneqarpoq.
Assiliisoq: Oscar Scott Carl
Naleraq ataqqineqarnerulissasoraa
Naleraq Folketingimut ilaasortaatitaqareernikuuvoq, Aki-Matilda Høegh-Dam qinersiviup ilaani Siumumiit Naleqqamut nuummat. Partii siullermeerluni maanna isertitaqarpoq, Folketingimummi ilaasortap tunuartup qatanngutaa iserami. Tassunga killittoqarnerani partiip pilersitsisua, Hans Enoksen, siorna qimaguttoq Naleqqap siulittaasuata eqqaanngitsoorsinnaanngilaa.
- Tanngassimaassagaluarpoq suliani takusinnaasimasuuguniuk, suli taama ersaritsigisumik, sualummik isorliunerusuni taperserneqartugut, Pele Broberg oqarpoq.
Naleqqap Folketingimut isertitaqarnera Danmarkimi ataqqineqarnerunermik kinguneqassasoq partiip siulittaasuata naatsorsuutigaa.
- Danmarkimi eqqartorneqartarnikuugami Naleraq suunngitsutut, tassami Danmarkimut kisiartaalluta angertuunnginnatta. Ukua innuttaasut 25 procentii ataasiaannarlutik Naleqqamik taasiartornerartarlugit pigamikkit. Massakkut takutinneqaqqippoq Naleraq innuttaasut 25 procentiisa taaqqikkaat, aali Folketingimut.
- Immaqa Naleqqamut isiginnittariaasiat ataqqinninnerulaalissaaq, Pele Broberg oqarpoq.
Pele Brobergip Naleqqamik tapersersuisut qujaffigai.
Assiliisoq: Oscar Scott Carl
Assatik Inuit Ataqatigiinnut isaappaat
Danmarkimi qinersineq qiviaraanni kikkut naalakkersuisunngortitsissaneri ingerlaannarluni eqqoriaruminaappoq. Naalakkersuisoqatigiissimasut Socialdemokratiet, Moderaterne Venstrelu ingerlaqqissagunik amerlanerussuteqarsinnaanngillat. Taamaammat isumaqatigiinniarnerit sivisussangatinneqarput. Naleqqap siulittaasuata pisut arajutsisimanngilai.
- Danmarkimi qinersineq tukappoq, tassa qinersisartut pisinnaatitaaffiat. Taava politikerit suliassarivaat naaperiaanissartik. Uagulli soorunami maani qinikkat marluk suleqatigiissinnaanissaat anguniarlugu suleqataassaagut.
Naleqqap Folketingimut nunatsinnit isertitaqartup aappaa oqaloqatigiumallugu assammik isaassiffigaa.
- Uagut assammik ippassaq isaassivugut, ullumilu ataatsimiiffissamik attartuinikuulluta oqaloqatigiinnissanut. Taakku qanoq ingerlaneri tusalaariarlugit aalajangissavarput qanorpiaq pissanerluta, Pele Broberg oqarpoq.
Oqaloqatigiinnerit qanoq inerneqarneri takoriarlugu Qarsoq Høegh-Dam qaqugu Danmarkimukassanersoq inissikkumaarlugu Pele Brobergip oqaatigaa. Piaartumilli tappavunngassasoq naatsorsuutigaa.
