Peqqinnissaqarfik pillugu maalaaruteqartut amerlisut
Nakorsaaneqarfiup 2025-mi naammagittaalliuutit taarsiissutissallu pillugit ukiumoortumik nalunaarusiani saqqummiuppaa. Peqqinnissaqarfik pillugu naammagittaalliuutit 2021-mit marloriaammik annertunerulersimasut suli amerliartortut kisitsisit ersersippaat.
Naak innuttaasut amerliartuinnartut pisortatigoortumik naammagittaalliortaraluartut suliat quliugaangata ataasiinnaq pisortatigoortumik isornartorsiuutaasarpoq.
Assi: Emil Helms/Ritzau Scanpix
Nunatsinni peqqinnissaqarfimmi naammagittaalliuutit taarsiiffigitinnissamik qinnuteqarfiusut amerliartupiloorput. Naammagittaalliuutit taarsiiffigitinnissamullu qinnuteqaatit ukiup siulianut sanilliullugit 58-inik amerlisimasut kisitsisit nutaat 2025-meersut ersersippaat.
Suliat 2021-mi 119-init nalunaarsorneqarsimasut 2025-mi 270-inut amerleriarsimapput. Ukiut sisamat ingerlanerinnaanni marloriaataa sinnerlugu amerlanerupput. Saaffiginnissutit peqqinnissaqarfiup immikkoortuinut tamanut tunngapput, katsorsaaviilli anginerusut pillugit saaffiginnissutigit takussaanerupput.
Naammagittaalliuutit taarsiiffigitinnissamillu qinnuteqaatit amerlanersaat immikkoortortaqarfinnut annerusunut, soorlu Dronning Ingridip napparsimmavissuanut (DIH) aamma Dronning Ingridip peqqissaavianut (DIS), tunngapput
Takussutissiaq: Nunatsinni Nakorsaaneqarfik
Suliat amerlanerpaartaat naammagittaalliuutitaqanngitsumik naammassineqartartut
Peqqinnissaqarfimmi naammagittaalliornerit quliugaangata ataaseq isornartorsiuinermik kinguneqartarpoq. Taamaattoqartillugu oqartussaasut kukkusoqartussaanngikkaluartoq kukkusoqarsimanera uppernarsartarpaat.
Isornartorsiuinerit katsorsartarfinnit katsorsaariaatsinillu assigiinngitsunit pisarput. Suliat amerlanerpaartaanni – quliugaangata qulingiluat missaanni – peqqissaanermik sulialinnut naammagittaalliuutigineqartut isornartorsiorneqarneq ajorput. Taamaattoqartillugu nakorsartinnerup suliamut najoqqutassiat malittarisassallu atuuttut naapertorlugit ingerlanneqarsimanera oqartussanit nalilerneqartarpoq, tamatumalu kingorna suliat unitsinneqartarput.
2025-mi suliat amerlanerpaartaat suli „suliarineqarput“ (54 procentit) imaluunniit „suli suliarineqanngillat“ (10 procentit). Tamatuma inatsimmik allannguinerup kingorna suliassanik nutaanik arlalinnik tigusaqarsimaneq ersersippaa.
Takussutissiaq: Nunatsinni Nakorsaaneqarfik
Isornartorsiuineq taarsiinerlu
Isornartorsiuineq tassaavoq peqqinnissaqarfiup suliassamik naammaginartumik suliarinnissimannginneranik oqartussat pisortatigoortumik nalunaarutaat. ’Styrelsen for Patientklager’, tassa nakorsarneqartut naammagittaalliutaannut aqutsisoqarfik Danmarkimiittoq naliliereeruni katsorsarneqarneq nalinginnaasumik akuerineqarsinnaasunik najoqqutassianik qaffasinnerusoq imaluunniit napparsimasup pisinnaatitaaffiinik unioqqutitsisimanersoq aalajangiisuusarpoq.
Isornartorsiuineq pisumut aalajangersimasumut tunngagaluarluni katsorsaaviit siunissami assingusunik kukkussuteqarnaveersaarniassammata aamma ilinniarfiuvoq. Isornartorsiuinerli aningaasatigut taarsiiffigitinnermik kinguneqartuaannarneq ajorpoq, tassami taarsiissutissat Napparsimasunut Taarsiissuteqarfimmi immikkut ittumik nalilersorneqartarmata, ukiumoortumik nalunaarusiami allassimavoq.
Aningaasanik taarsiiffigitinniartut amerliartupiloortut
Taarsiinissamik qinnuteqaatit amerliartupiloorsimapput, 2024-mi 63-iusunit 2025-mi 89-inut. 2021-mit 2025-mut suliat misissuataaraanni taarsiiffigitinnissamut suliat amerlassusaat pingasoriaatingajanngorsimavoq.
Napparsimasut naammagittaalliorsinnaatitaanerat taarsiiffigitissinnaanerallu pillugu Inatsisartut inatsisaat februaarip 14-ani 2025-mi atuutilermat taarsiiffigitinnissamik qinnuteqaatit amerliartulerput.
Taarsiiffigitinnissamut qinnuteqaammik suliaqarneq naammagittaalliuummik suliaqartarnermit immikkoorpoq. Naak katsorsarneqarneq pisortatigoortumik isornartorsiorneqarsinnaanngitsoq peqqinnissaqarfimmi oqartussaasut naliliigaluartut napparsimasup ajoqusersimanerminut aningaasatigut taarsiivigineqarnissaa pisinnaavoq.
Kiffartuineq pillugu naammagittaalliuutit oqaloqatigiinnermullu periarfissat nutaat
Kiffartuussineq pillugu naammagittaalliuutit sumiiffinni allani ajornartorsiutaasunut sanilliullugit ikilerialaarsimapput, 2024-mi 78-iusimasut 2025-mi 73-iusimapput.
Kiffartuussineq pillugu naammagittaalliornermi nakorsaatitigut katsorsaaneq naammagittaalliuutigineqanngilaq, utaqqisoqarpallaarnerali, attaveqatigiinnginnerup ingerlanerliornera sulisulluunniit pissusilersoriaasia naammagittaalliuutigineqarpoq.
Naammagittaalliuuteqarneq suliarineqareerpat isornartorsiuisoqarpallu tamanna peqqinnissaqarfimmi aqutsisunut nalunaarutigineqartarpoq, taakkulu isornartorsiuinerup aaqqiissuteqarfiginissaa isumagisarpaat.
Kiffartuussineq pillugu naammagittaalliuutit 2023-mi amerlanerpaapput, 102-nik naammagittaalliuteqartoqarsimavoq, 2025-mili 73-inut ikileriarsimapput.
Takussutissiaq: Nunatta Nakorsaaneqarfia
Inatsisit nutaat suliamut tamakkiisumut ukkatarinnilersitsisut
Naammagittaalliuutit taarsiissutissallu pillugit inatsit nutaaq februaarimi 2025-mi atuutilersinneqarmat aaqqissuussineq nutarterneqarsimavoq. Peqqinnissakkut sullinneqarneq pillugu maalaarutit maanna sulisut ataasiakkaat pinnagit sullinneqarnerup tamakkiisup ingerlanneqarnera naapertorlugu suliarineqartarput.
Nakorsarneqartut nakorsartiffimminni oqaloqateqarsinnaalernerat nutaajuvoq. naammagittaalliuutit qulingiluat taamaaliortoqareermat tunuartinneqarmata tamanna iluaqutaasoq misilittakkat takutippaat. Aamma Danmarkimi napparsimasunut taarsiissutissanut aningaasartuutit akilerneqartarnerat pitsaanerulerlunilu nakorsaaneqarfik sulianik pisoqaavallaartunik inatsisilluunniit killissarititaasa avataaniittunik itigartitsipallassinnaalersimavoq.
Nakorsaaneqarfik maannakkut sulianik pisoqaavallaartunik imaluunniit suliarineqartussaanngitsunik immikkoortitsipallassinnaasutut inissisimavoq. Tamanna piffissamik sipaarfiullunilu nukiit sulianut eqqortunut atorneqarnissaannik qulakkeerinniffiuvoq.
