Peqqinnissaqarfiup atortui nutaat napparsimasut nunatsinni tamaneersut iluaqutigissagaat

Peqqissaaviit, nunap immikkoortuini peqqissaaviit Nuummilu Dronning Ingridip Napparsimavia nutaanik tarrarsuinermi atortortaarput.   

Taama Naalakkersuisut tusagassiorfinnut nalunaarummi allapput.  

Katillugit tarrarsuinermi atortut nutaat 17-t pisiarineqarput. Taakku tassaapput Uummannami, Upernavimmi, Qaanaami, Qeqertarsuarmi, Qasigiannguani, Maniitsumi, Narsami, Nanortalimmi, Paamiuni Tasiilamilu peqqissaaviit kiisalu Ilulissani, Aasianni, Qaqortumilu nunap immikkoortuini peqqissaaviit kiisalu Nuummi Dronning Ingridip Napparsimavia.  

Taakku saniatigut Nuummi Dronning Ingridip Napparsimavia nutaanik marlunnik CT-scannerertaarpoq, peqqinnissaqarfillu Ilulissani nunap immikkoortuani peqqissaavimmi CT-scannerimik nutaamik pissarsinissamut pilersaarusiuleruttorpoq. 
 
Atortut nutaat sukkanerusumik eqqornerusumillu nunarput tamakkerlugu napparsimasunik misissuisitsisinnaanngussapput. Aningaasaliineq peqqinnissaqarfiup ineriartortuarneranik ikorfartuivoq, nunarpullu tamakkerlugu assigiiaarnerusumik muteerniunersumillu nappaatit suussusersinerinut neqeroorutinik tunngavissiissalluni. 
 
- Peqqinnissaqarfiup nappaatinik assiliilluni suussusersiuutaata pitsaanerusunik pisinnaanerusunillu kingoraarserneqarnissaannut  
alloriangaatsiarnerput nuannaarutigalugulu tulluusimaarutigaarput. Atortorissaarutissat taakku napparsimasut pilertornerusumik sukumiinerusumillu misissorneqartalernissaannut sulisullu pitsaasumik katsorsaanissamik periarfissaqarnerulernissaannut iluaqutaassapput. Nunatsinni napparsimasut suminngaanneersuunerat apeqqutaatinnagu eqqortumik misissorneqarlutillu katsorsarneqarnissamik periarfissaqarnerulernissaat anguniarparput, Peqqissutsimut Inunnullu Innarluutilinnut Naalakkersuisoq, Anna Wangenheim (D), oqarpoq. 

Atortorissaarutit Naalakkersuisut danskillu naalakkersuisuisa Kalaallit Nunaata imminut napatittup pilersinnissaa pillugu sinaakkutitut isumaqatigiissummut septembari 2025-meersumut uiggiutigalugu peqqissutsimut tunngatillugu isumaqatigiissutip immikkoortuanik taallugu isumaqatigiissutaannit 9. februaari 2026-meersumit aningaasalersorneqarpoq. 

 
- Isumaqatigiissummi aningaasaliissutit ilaasa nunatsinni atortorissaarutit nutaanik kingoraarserneqarnissaannut atorneqarnissaat anguniarsimavarput. Taamaammat napparsimasunut sulisunullu malunnartumik iluaqutaasussamik aningaasaliinissamut piareersarsinnaanngornerput nuannaarutigaara. Tamatumani pisoq pingaaruteqarlunilu peqqinnissaqarfiup neqeroorutaanik ataavartumik ineriartortitsinerup pitsanngorsaanerullu ilagaa, Anna Wangenheim oqarpoq.  
 
Suliffeqarfiit suliassamut neqerooruteqarsinnaaqqullugit, peqqinnissaqarfiup nappaatinik assiliilluni suussusersiuutaasa CT-scanneriutaatalu nutaanut suliariumannittussarsiuunneqarput.  Neqerooruteqarnissamut piffissaliussaq 10. septembari 2026-p tungaanut ingerlanneqarnissaa naatsorsuutigineqarpoq. Kingorna suliarinnittussamik ukioq naatinnagu toqqaanissi siunertaralugu neqeroorutigineqartut peqqinnissaqarfiup nalilersussavai. Atortorissaarutissat 2027-p ingerlanerani ikkussorneqarlutillu atorneqalernissaat naatsorsuutigineqarpoq.