Kommuneqarfik Sermersuumi pisortaasimasup peqquserlussimasutut oqartussaaffimmillu atornerluisutut unnerluutigineqarnerata eqqartuussivimmi ulloq siulleq suliarineqarnera ilimaginngisamik pisoqarneranik aallartippoq.
Illersuisup Vilhelm Dickmeissip piumasarineqartut malinneqarsimannginneraraluarai eqqartuussineq ingerlaannassasoq aalajangerneqarpoq.
Kommuneqarfik Sermersuumi pisortaasimasup peqquserlussimasutut oqartussaaffimmillu atornerluisutut unnerluutigineqarnerata eqqartuussivimmi ulloq siulleq suliarineqarnera ilimaginngisamik pisoqarneranik aallartippoq.
Illersuisup Vilhelm Dickmeissip piumasarineqartut malinneqarsimannginneraraluarai eqqartuussineq ingerlaannassasoq aalajangerneqarpoq.
Eqqartuussiviup Sermitsiap piumasaa akueralugu atermik saqqummiusseqqusaannginneq atorunnaarsippaa. Sermitsialli angut eqqartuunneqartinnagu aqqa saqqummiutissanngilaa, atermilli saqqummiusseqqusinnginneq atorunnaarmat suliap allaaserinissaanut kiffaanngissuseqarnerulerpugut.
Kommunimi pisortaasimasoq eqqartuussiviup qeqqanut issiavimmut nalunaaqutaq 11.15 missaani ingippoq. Unnerluutigineqartutut oqaaseqarnissaminut pisussaaffeqanngikkaluarluni taamaaliorpoq.
Unnerluussisup unnerluussutit sisamaasut siullersaat aallarniutigaa. Unnerluussummi siullermi Eurocardimik, Kommuneqarfik Sermersuup pigisaa, aterminut allagartalimmik pisinnaatitaanani atuisimanera eqqartorneqarpoq. Unnerluussisoq piffissami 2018-imiit 2019-imut 23.550 koruuninik peqquserluuteqarsimasoq isumaqarpoq.
Qarasaasiatigut pinnguaatinut akiliisoq
Aakiliut sumut atorneqarsimaneranut takussutissat saqqummiuppai. Qarasaasiakkut pinnguaatinut – soorlu "PlayStation"-imut aamma "Fortnite"-mut – akiliinerit arlallit takuneqarsinnaapput.
Angutip unnerluutigineqartup korti akiliut nammineq siunertaminut atornerlussimannginnerarpaa, allalluunniit taamaaliornissaannut akuersiinnarsimanani. Eurocardimut misissueqqusisimavoq kortilu matusimallugu. Taamani pisortaaneq Lars Møller-Sørensen aamma paasitissimallugu eqqartuussivimmi oqaatigaa.
Møller-Sørensen unnerluussutip immikkoortuata aappaani aamma eqqaaneqaqqippoq, tassani unnerluutigineqartoq inuit sisamat 23.195 koruuninik akiliillutik angalanissaannut aningaasanik atuisimavoq. Angut pisussaaffeqarani sulinngiffeqarnerminut kommunimiit akiliunneqarsimasutut unnerluutigineqarpoq. Immikkoortup aappaa suli iserfigivallaartinnagu ulloqeqqanut unikkallartoqarpoq.
Unnerluussutip immikkoortua siulleq unnerluussutit tamakkiisumik eqqarsaatigalugit pingaaruteqannginneruvoq. Angut taanna unioqqutitsilluni suliffeqarfimmut aalajangersimasumut kommunimut isumaqatigiissuteqarnissamut ajugaatitsisimasutut aamma unnerluutigineqarpoq. Eqqartuussinerup ingerlanerani kingusinnerusukkut uterfigissavarput.
