Ph.d.-mik suliniummi nutaami kalaallisut inatsisilerinermi oqaastsit sammineqartut
Ph.d.-ngorniap Therese Lind Benhardtip kalaallisut inatsisilerinermi oqaatsit ineriartortinneqarsinnaanerat misissorniarpaa. Sulinermilu tassani nutserisut oqalutsillu nersualaarneqartut, taanna oqaluttuarpoq.
Assi: Odd Andersen/AFP/Ritzau Scanpix
Therese Lind Benhardtip Ilisimatusarfimmi
ph.d.-nngorniutiminik nutaamik aallartitsinermini, inatsisilerinerup oqaatsillu
naapiffii tikissavai.
Namminersorlutik Oqartussat nutserisoqarfiani
inatsisinik nutserinerit qanoq pisarnerat misissorniarpaa. Taassumalu aamma
suliniut oqaatsinik allattoqarfimmi Oqaasileriffimmi aallartittoq
misissorniaraa, Ilisimatusarfik tusagassiuutinut nalunaarummini allappoq:
– Siunertarineqarpoq nunatsinni
inatsisilerinermut tunngasutigut assigiinngitsutigut oqaatsit qanoq
ineriartortinneqartarnersut erseqqissarneqarnissaat. Ilisimasassat taakku
iluaqutaasinnaapput inatsisilerinermi oqaatsinik atuisussanut
ineriartortitseqqeqataasussanullu, ass. oqalutsinut nutserisunullu aamma
inatsisilerituunut kalaaliusunut, ilisimatusarfimmi ilinniartinneqartunut.
Therese Lind Bernhardtip oqalutsit nutserisullu sulinermi
oqaaserineqartunut tunngatillugu suliarisartagaat erseqqissarumavaa.
– Nutserisoqarfinni
atorfillit kalaallisut inatsisilerinermi oqaatsinik ineriartortitsinermi
nutaamik aqqutissiuisuupput, isumaqarpungalu tamanna
saqquminerusariaqaraluartoq,
Therese Lind Benhardt oqarpoq.
Therese Lind Bernhardt 2013-mi Nuummut nuuppoq,
siusinnerusukkullu namminersorlutik oqartussat qitiusumik allaffeqarfissuani
atorfeqarpoq. Kingusinnerusukkut lingvistikimik kalaallillu oqaasiinik
Københavns Universitetimi Ilisimatusarfimmilu ilinniarpoq.
