Pilersaarutit inissipput – upernaakkut ataatsimiinnissaq pissanganarluinnartoq

Inatsisartut upernaakkut ataatsimiinneranni ulloq siulleq qularnanngitsumik malinnaavigineqarnerussajunnarsivoq, Naalakkersuisunummi ilaasortat nutaat arlallit ullormi akuerineqartussaammata.

Aamma Kim Kielsenip Siumumit aninerata malitsigisaanik, kina Inatsisartuni siulittaasunngussanersoq aalajangerneqassaaq.

Vivian Motzfeldt, Naaja Nathanielsen, Bentiaraq Ottosen aamma Mads Pedersenip naalakkersuisuni atorfinnit tunuarmata atorfiit sisamat suli inuttalerneqanngillat.

Ataatsimiinnermi oqaluuserisassat katillugit 147-usut, tamannalu nunami politikkerit ulapittussanngornerannik isumaqartoq, siulittaasoqarfik nalunaarpoq.

- Inatsisartunut ilaasortanit immikkoortut nutaat katillugit 48-t Naalakkersuisunillu immikkoortut nutaat 33-it suliarineqartussatut oqaluuserisassanut ilanngunneqarput. Tamatuma saniatigut immikkoortut UKA25-mit kinguartinneqarsimasut 66-it ataatsimiiffiusumi suliarineqassallutik.

2026-mi upernaakkut ataatsimiinneq

• 2026-mi upernaakkut ataatsimiinneq marlunngornermi ulloq 14. april nal. 10.00 aallartissaaq
• Sapaatip akunneranut ullut pingasut Inatsisartuni ataatsimiittarfianni ataatsimiiffiusassapput – marlunngorneq, pingasunngorneq sisamanngornerlu – piffissami nal. 10.00 – 16.00
• Ataasinngornerit tallimanngornerillu ataatsimiititaliani ataatsimiiffiusassapput. Sapaatip akunnera 19 aamma 22 ullut marluk kisimik ataatsimiiffiussapput
• Pingasunngornerni marluk- pingasuni piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni. Akunneq apeqquteqarfiusinnaasoq siulleq ulloq 22. april pissaaq (Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni)
• UPA26-mi ulloq ataatsimiiffiusoq kingulliugallartoq tassaassaaq ulloq 18. juni