Pipaluk Lynge: Nunat sillimaniarnissamut periarfissaqarnissaat pingaaruteqartoq

Nunanut Allanut Sillimaniarnermullu Ataatsimiititaliap senatorit sisamat sapaatip-akunnerata naanerani ataatsimeeqatigai.

Tassani Kalaallit Nunaanni USA-milu sillimaniarnermut politikkimut tunngasut pingaaruteqartut senatorit sisamat, Lisa Murkowskip, Angus Kingip, Gary Petersip aamma Maggie Hassanip ataatsimiititaliallu isumaqatigiissutigaat.

- Eqqaamaneqartariaqarpoq uaguunngimmat nunatsinni sakkutooqarfinnik siusinnerusukkut matoorisimasut. Taamaattoq erseqqissarparput illersornissamut isumaqatigiissut 1951-imili atuuttoq, ukiunilu kingullerni nutarterneqartarsimasoq, suli inerisarneqarnissaanut soqutiginnikkatta, NASA-i Siulittaasoq Pipaluk Lynge oqarpoq.

Kalaallit Nunaat USA-tulli NATO-mut ilaasortaavoq.

Ataatsimiititalialli isumaqatigiissutip Kalaallit Nunaannut sapinngisamik annertuumik iluaqutissiinissaa soqutigigaa erseqqissarpaa:

- Uagutsinnut pingaaruteqarpoq isumaqatigiissutit kommuninut innuttaasunullu malunnaatilimmik sunniuteqartussanngorlugit ineriartortinneqarnissaat.

Ataatsimiinnerit amerlanerusut neriuutigigaat

USA-mi Senatorit nunatsinnut tikeraarnerat Donald Trumpip Kalaallit Nunaannik aqutsinissamik kissaateqarneranik pissuteqarpoq. USA-p senatoriisa aqqanillit januaarimi Folketingimut tikeraarnerminni  Kalaallit Nunaata nammineersinnaatitaanera paasilluarlugu oqaatigereerpaat. Kalaallillu politikeriinik sapaammi ataatsimeeqateqarnerminni aamma taamatut oqariartuuteqarput:

-Oqaloqatigiinnerit pitsaasumik paaseqatigiinnertaqartumillu ingerlanneqarput. Neriuutigaarput maanna naapinnerit siulliusut kingulliussanngitsut, aammalu siunissami naapeqqikkumaartugut. Senatorit ataatsimeeqatigisagut uagutsinnut aamma tikilluaqqusipput. Misigisimavugut tusarnaarneqarluta peqataatinneqarlutalu, Pipaluk Lynge oqarpoq.