PK-p siulittaasua paarlakaalluni suliartortartussat atugassarititaannut tunngatillugu: Ernummatikka marluupput

Danmarkimi peqqissaasut nunatsinnut suliartorusukkunik periarfissaqareerput. Maannali periarfissaq alla takkuppoq. Tassa najukkaminni atorfitsik paariinnarlugu nunatsinnut paarlakaallutik suliartortartunut ilanngussinnaalissagamik.

Taamaaliussagunik akeqanngitsumik najugaqarlutillu nunatsinni sulinerminni aningaasarsiamik 15 procentii soraarnerussutisiassaminnut ileqqaarutigisinnaavaat imaluunniit ataatsikkut tamaasa tigullugit.

Peqqissaasut nunatsinnut suliartorusuttut atugassarititaannut tunngasut nunatsinni Peqqissaasut Kattuffianit (PK) isumaqatigiinniaqataaffigineqarnikuunngillat, taamaammat qanoq inerneqarumaarneri pissanngatigisimavaat. Maannalu tassa inississimalerput. 

- Isumaqatigiinniarluarsimasut takusinnaavara, kisianni aamma ernumanermik pilersitsivoq, Peqqissaasut Kattuffianni siulittaasoq Navarana Johansen oqarpoq imalu nangilluni. 

- Ernumassutikka annerpaat marluupput. Naapertuilluanngitsumik misiginerup ulluinnarni inituallaalernissaa. Taavalu paarlatsit Namminersorlutik Oqartussanit tikisitat ikilinissaat. 

Nunaqavissut akiliissapput - tikisitat najugaqarnermut akiliissanatik   

Danmarkimi peqqissaasut nunatsinnut suliartorunik Peqqissaasut Kattuffiata isumaqatigiissutaat atorlugu akissarsisassapput. Taakkuli saniatigut akeqanngitsumik najugaqarlutillu immikkut ittumik tapeqassagamik nunatsinni atorfeqartunit ajunnginnerusumik atugassarititaqassapput. 

- Uagut maani nunaqavissuusugut najugaqarnermut akiliingaatsiartarpugut, taamaattumik taakku tikittussat najugaqarnermut akiliisussaanngitsut atugarissaarnerujussuanngorput maani nunaqavissuninngaanniit, Navarana Johansen oqarpoq.

Taamaammat assigiinngitsunik atugassaqartitaanerup ulluinnarni inittortoorutigineqartassappat siulittaasup paasisinnaavaa. 

- Atugassarititaasut naapertuilluannginnerannik misiginerup ulluinnarni inittortoorutigineqartassappat paasisinnaalluarpara. Illuatungaanili suliartortussat pisariaqartippagut. Pisariaqartitsivissorpugut. Taamaattumik piffissaq ungasinnerusoq eqqarsaatigalugu allatut eqqarsartariaqarpugut. 

AAMMA ATUARUK 

Peqqinnissaqarfimmi sulisut paarlakaallutik suliartortarnissaat Danmarkimi immikkoortortaqarfimmut isumaqatigiissutigineqartoq

Aaqqiissut pitsaanerpaaq: Aningaasarsiat naligiinnerulerlik

Siunissaq ungasinnerusoq eqqarsaatigalugu suna aaqqiissutaasinnaanersoq qularutiginngilaa. 

- Isumaqarpunga uagut maani nunaqavissut akissarsiaat, Danmarkimi akissarsianut naleqqiullugu naligiinnerulissasut. Massakkut nunaqavissut maani atorfillit akissarsiaat, Danmarkimi peqqissaasut akissarsiaannut naleqqiullugu ikinnerupput. Takkua qaffattariaqarput naligiinnerulersillugit, Navarana Johansen oqarpoq. 

Nunatsinni peqqissaasut aningaasarsiaannut isumaqatigiissut ataasiinnaavoq, Danmarkimi isumaqatigiissutit arlaqartut. Danmarkimimi peqqissaasut nunap immikkoortuini, kommunini, naalagaaffiup ataani namminersortunilu sulisut immikkut isumaqatigiissuteqarput. 

Taamaammat nunatsinni Danmarkimilu peqqissaasut aningaasarsiaasa nikingassutaat assersuuteqarfigiuminaappoq. Nikingassuteqartulli siulittaasup oqaatigaa. 

- Nalunngiinnarpara maanga tikittartut Danmarkimi akissarsiaminninngaanniit ikinnerusunik akissarsisarput, paarlatsitut tikikkaangamik imaluunniit atorfinikkaangamik. Taamaattumik uagut akissarsiagut ikinnerupput Danmarkiminngaanniit, Navarana Johansen oqarpoq.  

Aningaasarsiat qaffannerisa saniatigut peqqissaasunut ikiortit peqqissaasutut ilinniarsinnaalernissaat Danmarkimitulli periarfissaasariaqartoq Navarana Johansenip ilanngullugu aamma eqqaavaa. Nunatsinnimi ilinniarnertuunngorniarfik naammassisimanngikkaanni peqqissaasunngorniartoqarsinnaanngilaq.

Atorfinitsitseriaatsit sisamanngorput 

Paarlakaallutik suliartorusuttut isumaqatigiissusiorfigineritigut nunatsinni peqqissaasutut sulilerusuttut periarfissaat amerlipput.

Atorfinivittoqarsinnaavoq, Namminersorlutik Oqartussat isumaqatigiissutaat atorlugu paarlattaasoqarsinnaalluni, aammali suliffeqarfiit paarlatsinik suliartortitsisartut aqqutigalugit suliartortoqartarpoq.

Maanna aamma nikittaalluni suliartortunut ilannguttoqarsinnaalerluni. Paarlakaallutik suliartortalernerup periarfissaalernera peqqinnissaqarfimmi sulisussaaleqiffiusumut qanoq sunniuteqarnissaa PK-mi siulittaasup pissanngatigaa. 

- Paarlatsit Namminersorlutik Oqartussat atorfinitsitaat paarlakaallutik sulisut pitsaanerusumik atugassaqarmata taakkununnga ilanngukkusulernissaat aarleqqutigaara. Paarlatsit Danmarkimi kiffartuussivimmiit atorfinitsinneqartartut amerlanerulersinnaapput, taamaalilluni paarlakaalluni suliartortitsisalernissamut siunertaagaluartoq anguneqanngitsoorluni,) Navarana Johansen oqarpoq. 

Paarlatsimmi Namminersorlutik Oqartussat tikisitaat najukkaminnut annikikkaluamik akiliisarput, paarlakaallutillu suliartortartussat najugaqarnerminnut akiliisassanatik.