Politiassistenti Fisker Narsami kikkut tamarmik ilisimavaat. Inuilli qanoq oqarnersut tamatigut paasisinnaanngilai

- Ateriarlunga ullaakkorsiutisiniassaanga?

- Aap, taamaaliorit.

Narsami politeeqarfimmi ullaajuvoq. Politiassistenti Jens Christian Fiskeri ileqqumissut sinerissami immikkoortortat allat tamaasa peqatigalugit politeeqarfiup igaffiani ullaakkut paasissutissiilluni ataatsimiinneq naammassingajalerpaa.

Isiginnaarut qarasaasiamilu filmiliuut nerriviup isuani inissisimasut minutsialunnguit qaangiuppata ataatsimiinnermut allamut atorneqassapput. Jens Christian Fiskerip politiitut suleqataasa marluusut aappaat biilinut inissiisarfikkut ikaariarluni Pilersuisumut ullaakkorsiutisiniarluni ataatsimiinneq sioqqullugu matukkut anillappoq. Kaffi qalaleruttortoq Jens Christian Fiskerip oqarasuaataa sianerpoq.

- Aap, hallo, Fiskeriuna, oqarpoq, ataatsimoorfiusumiillu igaffimmit anilluni.

Politiit Narsami politeeqarfeeqqami septembarip aallaqqaataaniilli pingasuupput. Tamanna sioqqullugu Jens Christian Fisker kiisalu politibetjenti illoqarfimmi ”tungujortumik qaatiguulittut” kisimiillutik atuupput.

Politiit sulinerat Narsamilu unammilligassaat pillugit Sermitsiaq paasisaqarnerorusulluni septembarimi ullormi ataatsimi politiassistentimik Jens Christian Fiskerimik Kalaallit Nunaannilu Politiini ataqatigiissaarisumik malinnaavoq.

- Kalaallisut oqaluttunik aalajangersimasumik suleqatitaarnissarput assut kissaatigaarput, Jens Christian Fisker oqarpoq iggavimmullu uteqqilluni.

Kaffimik kuisivoq ingillunilu.

Politiit paarlattaasartutut atortagaat sulinngiffeqaraangat kalaallisullu oqalussinnaasumik ikiorneqarnissamik pisariaqartitsisoqartillugu, Jens Christian Fiskerip suleqatitaanilu Danmarkimi politiit immikkoortortaqarfiinit aqqaneq-marluusunit allaniit tikisitat kiserngoruttarput. Arlaannaalluunniit kalaallisut oqalussinnaanngilaq.

- Oqaatsitigut ajornartorsiuteqarneq maani ajornartorsiutit annersaraat.

'Aaqqiissutissarsisoqartarpoq'

Kalaallit Nunaanni Politiini politiit najukkameersut amigaataanerat unammilligassani annersaavoq, politiit pisortaat Bjørn Tegner Bay politiit atuagassiaanni siorna juunimi saqqummersumi apersorneqarnermini oqarpoq.

Politiit affaat najukkameersuullutillu affaat Danmarkimiit tikisitaapput. Tamanna ukiuni qulikkaani arlalinni kingullerni politiit najukkameersut ikinnerpaaffigigaat allaaserisami tassani allassimavoq.

Sinerissami pissutsit ajornerpaamik inissisimapput. Politiit nammineq kisitsisaataat naapertorlugit Nuummi ukioq manna juunip 30-anni nunaqavissut politiitut sulisut 70-iusut Kalaallit Nunaanni politiit sulliviini 18-iusuni quliusut ataatsimilluunniit politiimik nunaqavissumik atorfeqartitaqanngillat.

Politiit nunaqavissut kalaallisut oqalussinnaanersut politiit naatsorsorsinnaanngilaat. Taamatuttaaq politiit avataaniit atorfinitsitat oqaatsit suut oqaaserineraat nalunaarsorsinnaanngilaat.

Jens Christian Fiskerip Narsami politiimik kalaallisut oqalussinnaasumik qanga kingullermik sulisoqarsimanersoq ilisimanngilaa.

- Uanga maaniinnerma nalaani taamaattumik peqanngilaq. Suleqatigisatsinnik ataasiakkaanik sulinngiffeqarnermi taartaallutik maaniissimasunik peqarpugut, suleqatigisartakkatsinnilli aalajangersimasumik kalaallisut oqalussinnaasumik peqannginnerput ajornartorsiutigaarput, taanna oqarpoq.

Suleqataa, ullaakkorsiutinik pisiniarluni anisoq, inimut uteqqikkami kissarsuut ammarpaa. Håndværkerit qerisut arfinillit ristimut iliorarlugillu kissarsuummut ikivai.

Kalaallisut oqalussinnaasumik akornassinni sulisoqannginneq qanoq pisoqartillugu unammilligassartaqarpa?, Sermitsiap aperaa.

- Tassa oqarasuaat sianeraangat, imaluunniit saaffiginnittarfimmi ikiorneqarnissamik pisariaqartitsisoqartillugu, Jens Christian Fisker akivoq.

Taamatut pisoqartillugu ajornartorsiutit amerlanertigut aqqusinermiittunik oqaatsinik oqaluttunik ikioqqusinikkut aaqqinneqartarput. Qanoq iliuuseqarnissaq nassaarineqartarpoq, suleqataa oqarpoq.

- Aap, suliat aaqqinneqartarput. Taamaappoq. Suliassarli ingerlaannaq aaqqinneqarsinnaanngippat suut tamarmik unitsinneqartanngillat, Jens Christian Fisker oqarpoq.

Tamatigut piareersimasoq

Illoqarfimmi innuttaasut politiillu amerlanersaasa Jens Christian Fiskeri kinguliaatigut Fiskerimik taagorpaat.

- Anaanama kisimi Jens Christianimik taasarpaanga, taanna oqarpoq.

Taanna ullaakkorsioreernerup ullaakkullu ataatsimiinnerit kingorna politiit biilii Toyotat assakaasui sisamanik ingerlatitallit atorlugit illoqarfimmi ingerlaarpoq. Taassuma saniatigut Narsami politiit ATV-mik atugarisaminnik peqarput. Politiit angallataat umiatsiaaraq nunaqarfinnut tikeraarnissaq pisariaqaleraangat atorneqarsinnaasoq Qaqortumi inissisimavoq.

Jens Christian Fisker illoqarfimmi ingerlaarnermi arlaleriarluni inuit ilassiniarlugit unittarpoq. Umiarsualiviup eqqaani arriillillunilu umiatsiaaraq aqquserngup sinaaniittoq sinerpaa. Arnaq angutillu marluk motoorimik aaqqissuussipput.

Jens Christian Fisker arnamut saappoq.

- Qanoq ippit? Qaqugu umiatsiarara aaqqissuullugu aallartissavit?

Politiassistentip igalaaq ammoorlugulu talini biilip sinaanut ilivaa.

- Akunnerup naanerani piareersarsinnaassagunarpara, arnap akivaa.

Arnaq qanillivoq. Assigiinngitsunik eqqartueqatigiipput. Arnap angunni napparsimasoq, taamaammallu nammineq suliaqarnissaminut soqutigisaqatanilu piffissaqanngitsoq oqaluttuaraa. Jens Christian Fisker isumaqataalluni illarpoq.

- Takuss, Jens Christian Fisker naggataatigut Jyllandip avannaamiut sumiorpaluutaat atorlugu oqarpoq, ingerlaqqillunilu.

Illoqarfimmi kikkut tamarmik kinaanerit ilisimagaat isumaqarpit?

- Taamanna 99 procentimik qularutiginngilara, taanna akivoq.

- Ilaannikkut aamma inuit ajornartorsiuteqartillutik angerlarsimaffinnut ornigullutik matumut kasuttortarput. Susoqarsinnaavorluunniit. Taamatut pisoqartillugu politiit ikiuunnissaat pisariaqarnersoq nalilersortarpara, pisariaqarpat oqarasuaatikkut politiit upalungaarsimasunut sianeqqullugit qinnuigisarpakka – imaluunniit nammineq sianertarpunga, pigaartuugaangama, nassuiaavoq.

Pigaartuuneq sinerissami politeeqarfinni atorneqartuuvoq. Pigaartuugaanni akunnerup naanerani ulluinnarniluunniit nal. 16.00-ip kingorna pisoqassagaluarpat suleqatit upalungaarsimasut aggersarnissaat akisussaaffigineqarpoq.

Sermitsiap politiit pulaarmagit Jens Christian Fiskerip suleqataasa ilaat pigaartuuvoq.

- Kisianni akunnerup naanerani angalaassagutta qaqugu angerlarnissarput naatsorsuutiginerlugu ilisimatitsisassalluta isumaqatigiissutigaarput. Arlaannik pisoqassagaluarpat. Taamaammat arlaatigut suliuaannarpugut, Jens Christian Fisker oqarpoq.

'Politiiusoq kisimiilluni suliassanik assigiinngitsorpassuarnik isumaginnittoq'

Jens Christian Fisker ullaap tungaani illoqarfimmi angalaareerluni allaffimminut uteqqippoq. Illoqarfimmi utoqqaat illuanni najugaqartoq najugaqarfimmit qimaakulasoq, politiillu taassuminnga ujarlertariaqartarnerat pillugu pisortamik kingusinnerusukkut oqaloqatiginnikkiartussaaq.

- Ilaatigut erloqinartarpoq, najugaqatigiiffimmi tassani sulisut taassuminnga nakkutiginnilluartussaagaluarput. Ullulli arlaanni ajutoortoqassappat tammassagaluarpallu, taava ajornartorsiut uagutsinnut tunniunneqassaaq, taanna oqarpoq.

Narsami politiit ullormut sulinerat nalinginnaasoq qanoq ittuunersoq Sermitsiap aperimmani, ullut marluk assigiittanngitsut akivoq. Narsami politiitut sulitilluni suliassat assigiinngitsorpassuit isumagisinnaasariaqarpai.

- Uagut kisimiippugut, maani suut tamaasa isumagisarpagut. Tarnip pissusaanik ilisimasalittut, teknikkimut tunngasunik suliaqartutut – suut tamaasa ilaatigut isumagisinnaavagut, Jens Christian Fisker oqarpoq nangillunilu:

- Suliassaq arlaatigut nammineerluta paasisinnaanngikkutsigu soorunami immikkoortortaqarfiit allat isumalluutitut ikiortissarsiorfigisinnaasagut pigaagut.

Politiusup 63-inik ukiullip Narsamiinnera siulliunngilluinnarpoq. Jens Christian Fisker 2000-imi 2001-imilu politiitut siullerpaamik maaniippoq, Kalaallit Nunaannulli attaveqarnera siusinnerusukkut aallartippoq.

Qulingiluanik ukioqarluni, angajoqqaani ilagalugit Skagenimiit Narsamut 1972-imi nuupput. Angajoqqaavi illoqarfiup avataani, ilaqutariit najugaqarfiata eqqaani, minkinik (uumasunik qaqortunik meqqulinnik) nujuartanik uumasuuteqarfeqarput.

Jens Christian Fisker Narsami ukiuni sisamani atuarpoq, tamatumalu kingorna atuarnini nanginniarlugu Danmarkimut uterpoq. Tamatuma kingorna Jens Christian Fisker Kalaallit Nunaata kujataani arlaleriarluni sulinngiffeqartarsimavoq, aammattaarlu ilisarisimasani attatiinnartarsimallugit.

- Inuusuttut maanna taama ilisarisimatiginngilakka, angajoqqaavili ilisarisimavakka, taanna oqaluttuarpoq qungujullunilu.

Politiitut ilisarnaammik nassataqarluni Narsamisullu illoqarfeeqqami najugaqarluni tamatigut sulinermut piareersimasariaqaraluartoq illoqarfimmi pisoqartarnera qaqutigoortuuvoq. Politiit illoqarfimmi pinerluttuliornermut tunngasunik nalunaarutigineqartunik 93-inik 2025-imi suliaqarput. Politiit suliaasa marloriaataasa missaannik Nanortalimmi suliaqarput.

- Suliat amerlassusaat eqqarsaatigalugu malunnartumik ikinnerpaaffimmiippugut. Amerlanertigut inuit ikittuinnaat suliat 80 procentiinik pilersitsisarput, Jens Christian Fisker oqaluttuarpoq.

Sermitsiap Narsami politiit pulaarmagit, sapaatip-akunnera sioqqullugu Kommune Kujallermi imigassamik inerteqquteqarneq atuutilersussaavoq. Jens Christian Fisker naapertorlugu politiit suliassanut orniguttarnerisa amerlanerpaartaat imigassamut attuumassuteqarput.

- Suliassallu amerlasuut aamma ornigunnitsinni naammassereersimasarput, Jens Christian Fisker oqarpoq.

Kikkut tamaasa ilisarisimasaralugit

Narsami politiit paarlattaasartuat, Narsami Politiit suliassaannik isumaginninnermi pingaaruteqarluinnartumik inissisimavoq. Jens Christian Fisker naapertorlugu kalaallisut oqalussinnaasunik amerlanerusunik atorfinitsitsisinnaaneq oqaatsitigut unammilligassanik oqilisaataasinnaavoq.

Ajoraluartumilli politiit paarlattaasartussaannik pissarsiniarneq ajornakusoortuuvoq.

- Tamaviaarluta ujaasivugut, suugaluarnersorli pissutaalluni suliassaq taama kajungernartiginngilaq, Jens Christian Fisker oqaluttuarpoq.

Politiimik kalaallisut oqalussinnaasumik suleqateqarnerup qanoq pingaaruteqartiginera politiit paarlattaasartuata politiinik nakkutilliilluni angalaqatigigaangagit ersarinnerpaamik takuneqarsinnaavoq.

Taamatut pisoqartillugu oqallinnermi oqaaseqarnerpaasartoq tassaavoq politiit paarlattaasartuat.

Imaappa suliffimmi kalaallisut oqaluttumik suleqateqanngikkuit suliassat ilaat suliarisinnaanngilluinnaritit?

- Naamik, maani suliassat tamaasa suliarisinnaavagut. Oqaatsitigut aporfeqarneq pissutigalugu suliassat ilaat ajornarnerulersarput, kisianni tamakkiisumik suliarisarpagut, Jens Christian Fisker akivoq. Kisianni aamma ikiorneqarnissaq siunissami takuneqarsinnaavoq.

Siunissamilu ikiorneqarnissaq ujartorneqarsinnaavoq.

Narsami politeeqarfimmi allaffissornermut immikkoortortaqarfimmi sulisussamik nutaamik kalaallisut oqalussinnaasumik atorfinitsitsisoqarpoq. Taannali politiini sulisut allat assigalugit, isumannaallisaanikkut akuerineqartariaqarpoq. Isumannaallisaanikkut akuersissut Sermitsiap septembarip naanerani pulaarnerani suli tunniunneqarsimanngilaq.

Illoqarfimmi Narsami najukkami sulisussanik politiinut atorfinitsitsiniarneq sooq taama ajornakusoortigisoraajuk?

- Illoqarfimmi matumani kalaallisut oqalullutit suleqataaguit, kikkut tamarmik ilisarisimassavatit. Taamaappoq. Politiillu taartaattut suligaanni sukangasuutut isigineqarneq akulikitsumik pisarpoq. Nunaqavissuulluni taamatut isigineqarnissaq ajornakusoorsinnaasoq takorloorsinnaavara.

Kalaallit Nunaanni Politiit, nunaqavissunik politiinik amerlanerusunik atorfinitsitserusupput, sulisussarsiornerli ilungersunarpoq

Oqaatsitigut unammilligassat naak piugaluartut, Jens Christian Fiskerip Narsamiinnini nuannaarutigigaa qularutissaanngilaq. Taamaammat isumaqatigiissutini ukiumik ataatsimik sivitsorpaa.

- Tassami oktoberip 31-ani soraartussaagaluarpunga. Maaniiginnarnissara assigiinngitsutigut nuannersumik tigulluarneqareerpoq, taanna oqarpoq.

Maannalu Narsami politiit ikiortaat pingasuummata suliat oqinnerulerput.

- Assut, assut oqinnerulerput. Kiffaanngissuseqarnerulerpugut, taanna oqarpoq.

Tamaani sulinippit sunartaajuna nuannersuusoq?

- Tassa, tamaaniissallunga nuannaraara. Maani pissutsit uannut iluarnerusumik ingerlasarput. Inuit maaniittut nuannersorujussuupput. Oqaatigissallugu nassuiaruminaappoq.