Politiit Ilulissani persuttaasoqarsimanerani takunnittussarsiorput
Ilulissani imerniartarfiup Naleqqap silataani inuk inunnit arlalinnit arfininngornerup ullaassaani persuttarneqarsimavoq. Pisumi politiit takunnissimasinnaasunik ujartuipput. Taassuma saniatigut Nanortalimmi biilinik ajutoortoqarpoq. Biilinik ingerlatsisoq imigassartorsimalluni biilinik ingerlatsisimasutut pasineqarpoq.
Ilulissani politiit persuttaanermik takunnissimasunik ujartuipput.
Foto: Grønlands Politi
Inuk inunnit arlalinnit Ilulissani Naleqqap silataani arfininngornerup ullaassaani saassunneqarpoq persuttarneqarlunilu.
Persuttaasoqarnera pillugu nalunaarut nal. 02.55 politiit tiguaat, Kalaallit Nunaanni Politiini pigaartut pisortaat Jørgen Madsen ilisimatitsivoq.
- Suliami pasisaqarpugut. Sulili pisumi takunnissimasinnaasunik oqaloqateqarusuppugut, taanna oqarpoq.
Persuttaasoqarneranik takunnissimasut politiinut attaveqaqquneqarput, 70 14 48-mut.
Nanortalimmi imigassartorsimalluni biilinik ingerlatsisoq
Nanortalimmi arfininngornermi unnukkut aamma ajutoortoqarpoq. Nal. 00.53 nalunaarutigineqarpoq biilit ajutoorsimasut.
- Politiit sumiiffimmeereerput. Biilinik ingerlatsisimasoq imigassartorsimalluni biilinik ingerlatsisimasutut pasineqarpoq. Biilinik ingerlatsisoq aaversereersimalerpoq, naatsorsuutigisinnaavarpullu suliami akiligassiisoqarumaartoq, Jørgen Madsen oqarpoq.
Suliat taakku marluk saniatigut angerlarsimaffimmi eqqissiviilliortoqarnernut silamilu aalakoorlutik imminut paarisinnaajunnaartunut arlalinnut politiit orniguttariaqarsimasut, pigaartut pisortaat ilisimatitsivoq.
