Politiit nalunaarusiaat: Pinngitsaaliineq, tillinniarneq imigassartorsimallunilu biilerneq
Taamattaaq arfininngornermi politiit inuit aalakoortorpassuit aqqusinerniinnerannik suliaqarput. Nuummi persutaasimanermut politiit takunnissimasussarsiorput.
Assi: Oscar Scott Carl
Politiit
Nuummi sineriammilu arfininngormat ulappussimasut, pigaartut pisortaat Aputsiaq
Hansen nalunaarpoq.
Imigassartorsimanermut
attuumasunik arlalinnik pisoqarsimavoq, tassani aqqusinerni
eqqissiviilliortitsinerit, angerlarsimaffinni eqqissiviilliornerit, imminut
toqunnissamik siorasaarinerit allallu pisimapput.
Ilulissani
politiit angut aalakoortoq suliffeqarfimmi biiliinik ingerlatsisoq unitsippaat.
Inuup kinaassusersiniarnera ajornakusoortinneqarpoq, taannalu isertitsivimmi
unnuisinneqarpoq.
Sisimiuni
pinngitsaaliinermik nalunaarutiginnittoqarpoq. Taanna pillugu politiit
pinerliivigineqartoq misissuinerlu pissutigalugit annertunerusumik
oqaaseqarsinnaanngillat.
Nuummi
tallimanngornermi unnukkut aqqarnup missaani Sipisaq Avannarlermi
saassussinermik takunnissimasut ilisimasaqartulluunniit tusarfigerusuppaat.
Angutip persuttarneqarsimanini, isimmittarneqarsimanini mobiiliminillu,
aningaasivimminik jakkiminillu inunnik marlunnik ilisarisimanngisaminit
tilliffigitissimanini nalunaarutigaa.
Taakku
kalaalerpalututtut kalaallisullu oqaasilittut, 25-30-t missaanni ukiulittut
180-185 cm-itullu angissusilittut isikkoqarnerarneqarput.
Paasissutissaateqaruit 701448-mut sianerit.
