Politiit ulapputtut: Pisiffimmut tillinniarneq, hashimik eqqussineq aalakkunnerlu

Arfininngornermi ullaap tungaani Kalaallit Nunaanni Politiini pigaartut pisortaata Aputsiaq Hansenip ulloq unnuarlu kingulleq pisut eqikkarpai, siornatigullu pisarnertut tallimanngorneq aalakkuffissuuvoq.

– Inuit imminnut akisussaaffigisariaqarput aalakkuulernissarlu killissamillu qaangiineq pisinnagu eqqarsarluarlutik. Meeqqat inersimasut pissuserisartagaannik nangitsisarnerat eqqaamaneqartariaqarpoq, Aputsiaq Hansen oqarpoq.

Nuummi sinerissallu sinnerani persutaanerit arlalissuit, aqqusinernilu angerlasimaffinnilu eqqissiviilliornerit kiisalu imminut toqunnissamik siorasaarinerit pisimasut taassuma oqaluttuaraa. Ilaatigut Sisimiuni aalakoorluni biilertoq inummik ajoqusiilluni ajutoorpoq.

Pisiffik Qinngorput tillinniarnermik nalunaarutiginnippoq, nioqqutissaasivimmillu tillittoqarsimavoq. Sapaatip akunnerata naanerani kingullermi taama aamma pisoqarpoq, tassanilu cigaretit tillinneqarput. Politiit pisumi pasisaqarput.

Taamattaarlu inuit marluk Nuup Mittarfiani ikiaroornartumik eqqusseriaraluartut tigusarineqarput. Siulleq anillatinneqaqqaartussamik timimini hashimik toqqortaqarnini pissutigalugu unnuisinneqarpoq. Hashi qanoq annertutigerpiartoq pineqarnersoq arfininngornermi ullaap tungaani suli nalunaarutigineqanngilaq.