Politikeri borgmesterimut: Imigassanik inerteqquteqarneq iliuusissanik allanik malitseqartinneqartariaqarpoq

Naalakkersuisut Kommune Kujallermi kommunalbestyrelsip, borgmesteri Malene Vahl Rasmussen (D) siuttoralugu qinnuiginninnerata kingorna imigassanik aalakoornartulinnik inerteqquteqarallarnissamik aalajangernerat tallimanngornermi unnukkut tupaallaatigineqartumik nalunaarutigineqarpoq. 

Inerteqquteqarneq 2,25 volumenprocentimik imaluunniit annertunerusunik  aalakoornartulinnik tuniniaanermut kiisalu sassaalliinermut atuuppoq. Inerteqquteqarnerup qaqugu atorunnaarnissaa suli ullulerneqanngilaq. 

Kommunalbestyrelsimi ilaasortaq Ivalo Motzfeldt (IA) borgmesterimut ammasumik allakkamini allappoq, inerteqquteqarnerup suliniutinik malitseqartinnissaa pingaaruteqartorujussuusoq:

- Kommunitsinni atornerluinermik ajornartorsiuteqartut taakkulu qanigisaat aamma ikiorneqarnissamik pisariaqartitsisut allat tamarmik tapersersorneqassapput.  Immikkut iliuuseqarnikkut imigassamik aanngajaarniuutinillu allanik ajornartorsiuteqarneq annikillisillugu siumut aallartoqarsinnaavoq.

- Imigassanik inerteqquteqarneq iluaqutaassappat ajornartorsiutip qiterisaa iliuuseqarfigineqartariaqarpoq, Ivalu Motzfeldt allappoq, Allorfiullu katsorsaasarnera kommunimi illoqarfinnut nunaqarfinnullu annerusumik siammarneqartariaqartoq eqqaallugu.

Ajornartorsiutit annertuut

Imigassamik ajornartorsiuteqarnerup kommunimi annertunera Ivalo Motzfeldtip ilumoornerarpaa: 

- Taakku ima annertutigipput, akissarsiffiup nalaani sulisut annertuumik amigaataasarlutik, angajoqqaatip ammasumik allakkamini taama allappoq.

Aaqqiissutissat pillugit oqaloqatigiinnermut kommuni qaaqqusivoq

Iliuuseqarnerup sakkortuumik qisuariarfigineqarnera paasinartoq Kommune Kujalleq allagaqarluni nittartakkamini sapaammi saqqummiussivoq. Inerteqquteqarallarnerup innuttaasunik suliffeqarfinnik sassaalliisinnaasunik, taamaammallu tuniniaanermi akisussaasuusunik imigassartornermilu aamma akisussaaffeqartunik aamma eqquisoq kommunip paasisinnaanerarpaa. 

Qaqortumi, Narsami Nanortalimmilu ataatsimoorluni oqaloqatigiinnissamut kommuni allakkiami qaaqqusivoq: 

- Tassani kommunip innuttaasut attuumassuteqartullu katersorniarpai, ajornartorsiutit pillugit ammasumik unneqqarissumillu eqqartueqatigiinnissamut - kisianni pingaarnerpaamik aaqqiissutissat pillugit.

- Kommunitut qanoq pitsaanerusumik iliorsinnaavugut? Ilaqutariit inuiaqatigiillu najukkamiittut qanoq iliorsinnaappat? Meerartagut qanoq pitsaanerusumik illersorsinnaavagut? Pinaveersaartitsineq qanoq nukittorsarsinnaavarput? Qanoq ineriartortitsisinnaavugut, taamaalilluni maanna iliuuserineqartup pisariaarunnissaa anguniarlugu?