Assilialiortoq meeqqanullu atuakkiortartoq Bolatta Silis-Høegh, 1981-imi inunngortoq, allakkerivimmi Tusassimi assilialiornissamik suliassinneqarsimavoq, sulianilu nunap, sikup, qaqqat seqerngullu tarrilersup isikkuanik qalipaatigissumik assitalerlugu naammassivaa.
Qalipakkat maanna takusinnaasatta oqaluttuassartaa ukiut 70-it matuma siorna aallartippoq.
Assilialiortoq meeqqanullu atuakkiortartoq Bolatta Silis-Høegh, 1981-imi inunngortoq, allakkerivimmi Tusassimi assilialiornissamik suliassinneqarsimavoq, sulianilu nunap, sikup, qaqqat seqerngullu tarrilersup isikkuanik qalipaatigissumik assitalerlugu naammassivaa.
Qalipakkat maanna takusinnaasatta oqaluttuassartaa ukiut 70-it matuma siorna aallartippoq.
Europami allakkerivinnik suleqateqarneq 1956-imi aallartippoq, tamannalu aamma ataatsimut frimærkiliornermut ineriartorpoq. Nunat ilaasortaasut ukiu tamaasa frimærkinik marlunnik saqqummersitsisarput; ataatsimoorussamik assiliartalik ukiumilu qulequtarineqartoq pillugu namminneq isumassarsiartik.
Frimærki ataatsimoorussamik assiliartalik ukioq manna eqqumiitsuliortumit tyskimit Finlandimiumillu Klaus Welpimit qalipaatigissaartumik sananeqarpoq. Sapangat qaqortut arfineq-marluk nuisat ukiuni 70-ini ataannartumik suleqatigiinnermik oqaluttuarput. Bolatta Silis-Høeghimut suliassiissutigineqartoq qalipaatitigut assigiinngitsunik atugassaqarpoq, Europamiusut tunngavilimmik kalaalerpaluttumik assilialioriaaseq.
– Seqernup tarrinnerani qalipaatit kusanarnerusinnaanngillat, taamaammat qilaap immallu akornanni qaamanerup qalipaatiginneranik qalipaanissaq tulluarpoq, Bolatta Silis-Høegh Sermitsiamut oqarpoq.
Frimærkini kingullerni marlunni assiliartat illoqarfimmi peroriartorfimmini Qaqortumi puilasuliamit nerrivimmillu isumassarsiarai.
– Nammineq assilisakka Qaqortumilu paarsisukuma Karen Marie Kielsen-Høeghip angalanerminit nassiuttagai isumassarsiarisimavakka. Frimærkimi assiliartaq sumiiffimmit aalajangersimasumeersuunngilaq, Kalaallilli Nunaanneerpoq.
Frimærki nutaaq maajip arfineq-pingajuanni saqqummertussaq Bolatta Silis-Høeghip Tusassimi tuniniaanermi frimærkiliaasa katillugit aqqaneq-aappassaraat.
Rigami saqqummersitsineq
Bolatta Silis-Høeghip frimærkiliaa kalaalerpaluttoq.
Bolatta Silis-Høegh Kalaallit Nunaanni, Danmarkimi nunanilu tamalaani saqqummersitsinikuuvoq.
Saqqummersitsineq „KAAVIIAARNEQ° CYCLE“ ammarniarlugu Rigameeqqammerpoq, tassanilu aamma nunat avannarliit ministeriisa siunnersuisooqatigiivisa Letlandip illoqarfiisa pingaarnersaanni allaffiata ukiunik 35-nngortorsiornera malunnartinniarneqarpoq. Taassuma angutaa, assiliisoq atuakkiortorlu Ivars Silis Letlandimeersuummat saqqummersitsineq immikkut pingaaruteqarpoq.
- Letlandimi saqqummersitsineq uannut misigisaavoq nuannersoq, tamatigullu ilaquttat siornatigut naapissimanngisakka naapittarpakka, Bolatta Silis-Høegh oqaluttuarpoq.
Suliai Kalaallit Nunaanni katersugaasivinni soorlu Nuummi Eqqumiitsulianik Katersugaasivimmi aamma Nunatta Katersugaasiviani Allagaateqarfianilu saqqummersinneqarput.
