Qallunaat timmisartui F-35 siullerpaamik Kalaallit Nunaannut mipput – Amerikamiut sungiusaqatigissavaat

Danskit timmisartui sorsuutit F-35 pingasunngornermi siullermeerlutik Kangerlussuup mittarfianut mipput.

Taama Illersornissaqarfik nittartakkatigut nalunaaruteqarpoq.

Danskit timmisartui sorsuutit Amerikamiut timmisartuinik F-16-inik Canadamiullu timmisartuinik F-18-nit peqatigalugit Kalaallit Nunaata silaannaani sungiusarput.

Kalaallit Nunaata silaannaani sungiusarneq NATO-p sakkutooqarnikkut nakkutilliinermut aarlerisaarinermullu suliniutaasa pingaarnerit ilaattut ingerlanneqarpoq.

- Issittumi pissutsit immikkut ittuupput, F-35-mik timmisartortartoq Illersornissaqarfiup nittartagaannut oqarpoq.

- Sila ajorsinnaavoq allanngorartuarlunilu, miffissallu ungasissorujussuupput, taamaattumik piffissarujussuaq atorlugu, maanilu sulinitsinni navianaatit qanoq iliuuseqarfigissanerlugit pilersaarusiortarpugut.

Illersornissaqarfimmiit oqaatigineqarpoq sungiusarneq nunanit assigiinngitsuneersunit silaannakkut sakkuaatitsinermut ilaasoq.

Franskit timmisartuat orsiisartoq, danskit timmisartuat alapernaarsuut "timmisartortartut ilaat ajornartorsiulerpat“ ikiuiartortinneqartoq NATO-llu timmisartua AWAC radarimik timmisitsisoq peqataatinneqarput.

USA-p præsidentiata Donald Trumpip Kalaallit Nunaat pigilerniarlugu oqariartuuteqarnerata kingunerisaanik sakkortuumik isumaqatigiinngitsoqareersorlu Nato Issittumi alapernaarsuiartortitsivoq.

Ruslandip Kinallu aarlerinartorsiortitsinerat eqqarsaatigalugu Kalaallit Nunaanni isumannaallisaanermut naammattumik Danmark iliuuseqannginnera, USA-p præsidentiata Danmark isornartorsiorpaa.

RITZAU