Qaqortumi oqarasuaatit attaveqaataat teknikkikkut ajoquteqarput

Atuaasartut paasititsinerisa kingorna, nittartakkatigullu inuit attaveqaqatigiittarfiini naammagittaalliortoqareersoq, oqarasuaatikkut attaveqaatit ajornartorsiorneri qanoq annertutiginersut, Sermitsiap Tusassimut apeqquteqaatigaa.

Tusassip tamanna marlunngornermi uppernarsarpaa:

– Aserfallatsaaliuinermut pilersaarutaasumut atatillugu teknikkikkut sapaatip-akunnerani kingullermi ajornartorsiuteqalersimanera ilumoorpoq, tamannalu Qaqortumi 5G-mut attaveqarnermut sunniuteqarpoq.

– Ajornartorsiummut pissutaasoq paasiniarlugu piaarnerpaamillu aaqqiinissaq angujumallugu sulissuteqarpugut, attaveqaqatigiinnermut pisortaq Maasi Brøns Chemnitz oqarpoq.

Tusassip 2G-kkut attaveqaataasa ajornartorsiornerat oqarasuaatikkut sianersinnaannginnermut pissutaasoq nangilluni nassuiarpaa:

- Ajornartorsiut maanna aaqqinneqarpoq, atuisullu nalinginnaasumik oqarasuaatikkut attaveqaqqissinnaalerput, attaveqaqatigiinnermut pisortaq oqarpoq nangillunilu:

- Mobiltelefonit attaveqaataat illoqarfiup qeqqani inissisimammat unamminartoqarpoq, taamaattumillu sullitatta amerlanersaasa mobiltelefonip attaveqaatilunnera malugisarpaat.