Qarsoq Høegh-Dam isumaqatiginninniarnissamut piareersimavoq
Qarsoq Høegh-Dam 4.615-inik qinerneqarluni Folketingimut qinersinermi ajugaalluinnarpoq, Kalaallit Nunaat sinnerlugu isumaqatiginninniariarluni Danmarkimullu aallarnissaminut piareersimavoq.
Qarsoq Høegh-Dam 4615-inik qinerneqarluni ajugaalluinnarpoq, taamaalillunilu Folketingimut ilaasortanngorpoq.
Assi: Oscar Scott Carl
- Nuannaaqaanga! Nipituumik oqaluttariaqarpunga, Qarsoq Høegh-Dam unnuup ulapaarfiusup ingerlanerani nipituumik oqalulersimavoq.
Qarsoq Høegh-Dam (N) qinersinermi ajugaasut nalunaarutigineqarnerisa kingorna qanoq misiginersoq Sermitsiamit aperineqarami taama aallartippoq.
Naleraq qinersisoqarnerani siullermeerluni folketingimut ilaasortaatitaqalerpoq. Siornatigut Aki-Matilda Høegh-Dam, qinigaaffimmi kingullermi Siumumit partiimut nuuttoq, Folketingimi ilaasortaasimavoq.
– Kalaallit Nunaanni partii alla Folketingimut qinersinermi siullermeerluni qinigaavoq, Qarsoq Høegh-Dam oqarpoq.
Isumaqatiginninniarnissamut piffissanngorpoq
Qarsoq Høegh-Dam sulinissaminut piareersimavoq:
- Sulineq aallartittussanngorpoq. Naatsorsuutigaara piaarnerpaamik Danmarkimut aallarnissara, tassani ataatsimiinnernut peqataasinnaaniassagama.
Taama ingerlalluartiginissat ilimagisimaviuk?
– Neriuuteqarpunga! Piffissami sivisujaami politikkimi suliaqarpunga malugisinnaavara ajunngitsumik ineriartortoqartoq. Taamali ingerlalluartiginissaq - qinersivippassuani ajugaanissarput - tupaallannarpoq.
