Qulimiguulinnut mittarfik utoqqaat illuattut akunnittarfittullu atorneqarsinnaasoq

Qaqortoq mittarfittaareernerata kingorna qulimiguulinnut mittarfiunikoq, illoqarfiup silaannakkut angallannikkut ukiorpassuarni isumalluutiginikuusaa, qanoq atorneqassanersoq maanna pilersaarusiorniarneqaleruttorpoq.

Illoqarfimmi unnuiffissanik amerlanerusunik pisariaqartitsisoqaleriartuinnartillugu qulimiguulinnut mittarfiunikup eqqaa iluaqutaasinnaasutut isigneqarpoq.

Mittarfittaarnerup kingorna unnuiffissanik amerlanerusunik pisariaqartitsisoqalerpoq, kommunilu qulimiguulinnut mittarfiunikup eqqaani akunnittarfimmik 64-inik initalimmik pilersitsisoqarsinnaaneranut nunaminertamik qinnuteqaat suliarisussanngorlugu.

Siullermilli sanaartornissamut pilersaarut tusarniaassutigineqassaaq, tamatumalu kingorna akunnittarfimmik pilersaarutit isummerfigineqassasoq, kommunimi kommunalbestyrelsip ataatsimiinnissaanut oqaluuserisassani allassimavoq.

Suliffeqarfiit marluk Kûnuak’café aamma Inu:IT Bolig A/S, qulimiguulinnut mittarfitoqqap eqqaani, akunnittarfiliornissamut nunaminertamik qinnuteqarput.

4.400 kvadratmeterit

Akunnittarfik illorujussuartut sananagu sanileriaanik katillugit 64-inik initalinnik illutaqassasoq qinnuteqaammi atuarneqarsinnaavo. Aamma neriniartarfeqassaaq, ataatsimiittarfeqarluni sulisunullu initaqassalluni. Katillugu 4.400 m2-mik angissuseqassalluni.

Kommunimi Teknikkimut Avatangiisinullu Ataatsimiititaliap akunnittarfiup sanaartornissaanut akuersissummik tunisisoqarnissaa inassutigereerpaa, akunnittarfimmilli sanaartornissamut akuersissummik tunniussisoqartinnagu kommunip pilersaarutaanut tapiliussaq tusarniutigineqaqqaarlunilu inaarutaasumik akuerineqassaaq.

Kûnguak cafémeersup Martin Heilmann Kristensenip pilersaarutit ukiut marluk ingerlaneranni piviusunngortinneqarumaartut neriuutigalugu Sermitsiamut oqaatigaa.

Suliffeqarfiit Kûnguak`cafép aamma Inu:IT Boligip Qaqortumi sumiiffimmi allami akunnittarfimmik 35-nik initalimmik pilersaarut saqqummiunnikuuaat. Taanna maanna unitsinneqarallaqqavoq.