Rubio: USA-p Kalaallit Nunaannik soqutiginninnera isumannaallisaanermut taamaallaat tunngassuteqarpoq

USA-p naalakkersuisuisa Kalaallit Nunaannut soqutiginninnera nunap isumannaatsuunissaanut taamaallaat tunngaveqartoq.

USA-p nunanut allanut tunngasunut ministeria Marco Rubio tv-qarfimmut Fox Newsimut apersorneqarnermini marlunngornerup unnuaani taama oqarpoq.

- Præsidentitta erseqqissarpaa Kalaallit Nunaat pillugu apeqqut nunap tiguarneqarnissaanik tunngaveqanngitsoq, nunalli isumannaatsuunissaanik tunngaveqartoq, Marco Rubio oqarpoq.

USA-p, Danmarkip Kalaallit Nunaatalu, Kalaallit Nunaat pillugu isumaqatigiissuteqarnerisa kingorna nunanut allanut ministeri sapaatip akunnerani kingullermi apersorneqarpoq.

USA-p præsidentiata Donald Trumpip Kalaallit Nunaata pisiarinissaanik piumasaqareernerata kingorna isumaqatigiissut atsiorneqarpoq. Pisiariumanninneq Kalaallit Nunaannit Danmarkimillu itigartitsissutigineqarpoq.

Kalaallit Nunaat USA-mit tunguarneqassasoq, Trumpip Siorna oqaatigaa .

Isumaqatigiissut sapaatip-akunnerani kingullermi atsiorneqarpoq

Isumaqatigiissut sapaatip-akunnerani kingullermi atsiorneqarpoq, tassanilu USA Narsarsuarmi Mestersvigimilu illersornissamut nutaamik sakkutooqarfimmik pilersitsinissamut Pituffimmilu sakkutooqarfimmik alliliinissaanik periarfissaqalerpoq.

AAMMA ATUARUK

USA-mik isumaqatigiissuteqarnissaq sioqqullugu pissutsit eqqissiviilliorfiusut

Isumaqatigiissutip aamma Amerikamiut Kalaallit Nunaanni illersornissamut missiilit Golden Domep pilersinnissaanut periarfissiivoq.

Aamma isumaqatigiissut naapertorlugu naalagaaffiit aningaasaliisartulluunniit Natomut EU-mulluunniit ilaasortaanngitsut imaluunniit NATO-mut suleqataasut sumiiffinni mianernartuni sunniuteqarluarsinnaanngillat.

Rubio: Kalaallit Nunaat aatsaat taama pingaaruteqartigaaq

Marco Rubio Fox Newsimit apersorneqarami oqarpoq Kalaallit Nunaat marlunnik pissuteqarluni aatsaat taama ullumikkut pingaaruteqartigisoq .

Rubio naapertorlugu pissutaasup aappaa tassaavoq nunat arlallit — ilaatigut Kina — umiarsuakkut aqqutit nunani tamalaani niuernermut umiarsuarnillu angallannermut pingaaruteqartunik aqutsiniarsarinera.

- Aappaattut, avataarsuani sorsunnerit.

- USA-p imminut illersorniarluni illersornissamut missiilinik pisariaqartitaanik sanasoqassappat Kalaallit Nunaat pingaaruteqartorujussuuvoq, amerika avannarlermut tamanut Marco Robio oqarpoq.

Akeqqamik aningaasaliinissaannik ernumassuteqarneq

Nunat akeqqamik aningaasaliinikkut assersuutigalugu mittarfiliorsinnaanerit, allamulli sunniuteqarsinnaasut USA-mi naalakkersuisut aarleqqussutigigaat, USA-mi nunanut allanut tunngasunut ministeri oqarpoq

- Sakkutuut sakkutooqarfigisaannut assingusumik umiarsualivimmik mittarfimmulluunniit, sakkutooqarfimmut eqqaanartunik sanasoqarsinnaavoq, Marco Rubio oqarpoq

USA-p, Danmarkip Kalaallit Nunaatalu isumaqatigiissutaat sapaatip akunnerani kingullermi marlunngornermi atsiorneqareersoq, Kalaallit Nunaanni Danmarkimilu inatsisartuni akuerineqartussanngorpoq.

RITZAU