Saalamiit tupinnartoq

Atuakkiortoq Erik Torm Amerikamiup assilialiortartumik Rockwell Kentimik soqutigisaqarnerminut atatillugu eqqumiitsuliortup marloriarluni Illorsuarniinnermini kiffatut sulisisorisimasaminut, Salamina Fleischer Møllerimut, nuannaarfinni ilungersorfinnilu atassuteqarnera pillugu atuakkiorpoq.

Atuagaq taanna ima qulequtaqarpoq: “Et gyldent lys – fortællingen om Saalamiits forunderlige livsforløb” (qaamaneq kissalaartoq - Saalamiip inuunera tupinnartoq pillugu oqaluttuaq, aaqq.)

Atuagaq 74-iinnarnik quppernilik atuaruminarpoq. Illorsuarni eqqaanilu 1890-ikkunniit 1930-kkut tungaanut inuusunut ilaqutaasunik ilisimatusarnermik soqutigisaqartut sivisunerusumik atuarsinnaavaat.

Erik Tormillu pisut tupinnaannartumik qaammarsaaffigai. Imaluunniit taamanikkut misigissutsit allatut oqaatigineqartarput. Taamaakkaluartoq atuagaq soqutiginarpoq.

Rockwell Kent siullermeerluni avannaani nunaqarfimmeereersoq, Saalamiip ilaatigut ima allaffigaa:

- Peqatigiissimanivut tamaasa puigunngisaannassavakka, asavakkit, soorlu uinnut asannittutut, tassami nuliattut pivarma.

Rockwell Kentip Saalamiimik naapinneqqaarnerminik allataa atuakkap immikkoortuani allami atuarneqarsinnaavoq. Ilaatigut ima allassimavoq:

- Inimi qaamangaarmat tarranut allaat kissalaartumik qalipaatilimmiippunga. Qaammaqqut kissalaartoq, taassumalu qeqqani, tassanngaanniit imaluunniit qaammaqqummut aallaavittut – ilisimaneqanngitsumik! – arnaq nikorfavoq.

Assiliartaa: Atuagaq “Et gyldent lys – fortællingen om Saalamiits forunderlige livsforløb” Uummannaq Polar Institute-p saqqummersitsivianit saqqummersinneqarpoq. Assi: Oscar Scott Carl