Saarulliit silap pissusiata allanngoriartornera pissutigalugu avannarpartertut
Saarulliit avannarparteriartorput, tamannalu imaani nerisaqaqatigiinnut annertuumik sunniuteqassaaq. Tamanna silaannaap allanngoriartorneranik pissuteqartoq misissuinerup nutaap takutippaa.
Saarulliit malunnaatilimmik unammillerneqangaatsiarput. Pinngortitaleriffimmi misissuinerup nutaap takutippaa issittup imartaa silap pissusiata allanngoriartornera pissutigalugu unammillerneqartoq.
Toqqorsivimmit assi: Leiff Josefsen
Saarulliit 1990-ikkunniilli ikiliartornerat avannamullu saqiartulersimanerat Pinngortitaleriffimmi ilisimatusartut uppernarsarsinnaavaat, nerisassanillu pilersuinermi pingaarutilimmik inissisimaffeqarmata tamanna imaani nerisaqatigiiaanut annertuumik sunniuteqarpoq.
- Issittumi saarulliit amerlassusaasa siammarsimanerisalu allanngornerat aalisakkanut allanut puisinullu sunniuteqangaassaaq, taamaalillunilu aamma inuit piniarnissamut aalisarnissamullu periarfissaannut sunniuteqassaaq, Pinngortitaleriffimmit tusagassiuutinut nalunaarummi ilisimatitsissutigineqarpoq.
Tupaallannartoq
- Allannguutit tupaallannartumik sukkasuumik pisimapput, pissutaasinnaasullu tassaapput immap qaavata kissakkiartornera, sikusarnerata allanngoriartornera aamma saarulliit piaqqanut saarulleeqqanillu tappiorannartortut nerineqartartut ataqatigiinnerisa allanngortiartornterinik kinguneqartumik.
Saarulliit kujataani ikiliartortillugit pisat pillugit paasissutissat puisit, saarullinnik annermik inuussuteqartut, avannarpartersimanerat takutippaat.
- Tamanna silaannaap allanngoriartorneranut nerisaqatigiiaat sunnerneqarnerannut takussutissaavoq. Saarullittassiissutit aamma niuernikkut aalisarneq aammattaaq misissoqqissaarneqarput, silali saarulliit amerlassusaasa siammarsimanerallu allanngornerannut pissutaanerpaasutut isikkoqarpoq.
Atuagassiami saqqummersinneqartoq
Misissuineq atuagassiami tusaamasaalluartumi Arctic Science-mi saqqummersinneqaqqammerpoq, Pinngortitaleriffimmilu ilisimatusartut misissuinermik siuttuupput. Misissuineq tamarmi iliisimatuumit Teunis Jansenimit Aalisarnermut Uumassusillinullu immikkoortortaqarfimmeersumit siuttuuffigineqartoq uani (tuluttut) atuarneqarsinnaavoq.
