Danmarkip Nuullu akornanni angalanermut tapiissutit 205-it
Danmarkimi ilinniartut kalaallit akikitsumik nunatsinnut angerlarsinnaanerat siorna atuutilersinneqarpoq. Amerlasuullu periarfissaq atorsimavaat.
Aaja Chemnitzip naalagaaffiup Atlantikup Avannaani aningaasaliissutaaniit ilinniartunut aningaasaliinissaq isumagaa.
Assi: Kasper Søholt/Ritzau Scanpix
Kalaallit Danmarkimi ilinniartut Nuummut utimullu timmisartumik angalanerat 1.000 koruuneerlutik 2025-mi angalasinnaanngorput. Qallunaat aningaasanut inatsisaaniit aningaasaliiffigineqarluni tamanna periarfissaalerpoq.
Danmarkimi Ilinniartitaanermut Ilisimatusarnermullu Aqutsisoqarfik 2025-mi timmisartumut 1.000 koruuninik akeqartumut tapiissuteqarnissamik qinnuteqaatit 235-t suliarisimallugit, taakkunanngalu 205-it akuerineqarsimasut, nalunaarpoq.
Folketingimut ilaasortap Aaja Chemnitzip (IA) bilitsit akikillinissaat sulissutigisaraa:
– Nuannaarutigaara aaqqissuussaq taanna atorneqartoq. Misiliutaavoq, taamaattumik aalajangersimasumik periarfissaalissappat ilinniartut atornissaat pingaaruteqarpoq, oqarpoq.
Qinnuteqarsinnaanerup tullia ammangajalersoq
Ilinniartut Kalaallit Nunaannut attaveqarnerannik annertusaanissamut 2024-mi katillugit 6 millionit koruunit immikkoortinneqarput. Aningaasat naalagaaffiup Atlantikup avannaanut aningaasaliissutaanit ukiunut sisamanut atuuttumit immikkoortinneqarput.
Aaja Chemnitzip timmisartumik angalanissamut 1.000 koruuninik akeqartumut qinnuteqaqqissinnaanngortoqangajalersoq ilisimatitsissutigaa. Kalaallit Illuutaat Københavnimiittoq qinnuteqaatinik ikiuuttarpoq.
Danmarkimi ilinniagaqartut Kalaallit Nunaanneersut ukiumut ataasiarlutik neqeroorut atorsinnaavaat. Kalaallit Nunaata iluani angalanissamut tapiissutinik allanik tunniussisoqarneq ajorpoq.
Qinnuteqaatit 30-t ilinniarnermik aallussinerup naammannginnera pissutiginerullugu itigartinneqarsimasut Ilinniartitaanermut Ilisimatusarnermullu Aqutsisoqarfiup paasissutissiissutigaa.
