Kalaallit anersaavat pingaartittuaannarpara

Isaksen Design angutit tujuuluaraannik assigiinngitsunik nutaanik maanna februaarimi 2026-mi saqqummiussivoq. Saqqummiunneqartut nutaat nutaamik periaaseqarluni, ilisimaneqartunillu ilusilersuinernik, piumaneqarluartunik atoqqiinerupput. Nutaaliornerit takussallugit aamma Kalaallit nutaalianik atisaliortarfiata ileqqumisut Kalaallit kulturiannik pingaartitsinini aalajangiusimassaneraa takussallugu pissanganassaaq, tamannami Nickie Isaksenip ilusilersuisarneranut ilisarnaatitut atorneqartuarsimammat. 

Isaksen Design annerusumik arnanuinnaq atisaliortaraluarpoq.

- Arnat atisaannik assigiinngitsunik tamanik atisaliortarpugut, ukioq mannali angutinut taamaallaat tujuuluaqqanik tujuulunnillu atisaliorluta, Isaksenip atisaliaannik ilusilersuisartoq Nickie Isaksen oqarpoq.

Nickie Isaksen, Isaksen Design ApS-imik, arnani Rita Isaksen peqatigalugu 2002-mi aallartitaminnik, ullumikkut kisimiilluni piginnittuuvoq.

Ilaquttani tamaasa peqatigalugit

Suliffeqarfik ilaqutariit suliffeqarfiat pineqarpoq. Nickie Isaksen pisortaavoq, nammineq ilusilersuisarlunilu tunisassiortarpoq pisisartunullu attaveqartarluni. Suliffeqarfimmi Isaksenikkut ingerlataanni ilaquttat qitiulluinnartumik inissisimapput.

Rita Isaksen, suliffeqarfimmik pilersitseqataasoq, pisiniarfimmi Larsbjørnsstræde 11-miittumi pisiniartunik sullissisuuvoq aamma internetikkut tuniniaanermut inniminniinernullu akisussaasuulluni.

Suliffeqarfik kinguaariit tulliinit aamma soqutigineqarpoq. Ernerat angajulleq, Malik Angelo Isaksen, suliffeqarfimmut qanimut attuumassuteqarpoq, isumassarsiornernut attaveqaqatigiinnermullu suleqataalluarluni. Ilusilersuisarpoq, inoqatinut attaveqaqatigiittarfinnut ilanngussassanik suliaqartarluni – videoliat assillu ilanngullugit – aamma atisanik takutitsinerni aaqqissuisutut nipilersugalerisutullu atuuttarluni.

Nukarliup Nuka Angelo Isaksenip aamma aaqqissuussinerit isumassarsiornermigut atisanillu takutitsinerni nipilersugalerisutut aamma ikiuuttarpoq.

Ilaqutariit ataatsimoorlutik suleqatigiilluarput, tamatumani misilittakkat, isumassarsiullaqqissuseq nutaanillu isiginnittaaseqarneq ataatsimoortinneqarlutik – suliffeqarfillu ineriartortinneqarluni ataavartuuneq nutaaliornerlu siunertaralugit.

- Suliffeqarfik anaanagalu 2002-mi aallartitarput ineriartortorujussuuvoq, Nickie Isaksen oqaluttuarpoq.

Suliffeqarfik Danmarkimi atisaliornermik suliaqartut kattuffiannit ilaasortaaffigisaminit Dansk Mode og Tekstil-imit nunanut allanut tuniniaanermut, ussassaarinermut, niuerfinnik nutaanik ujartuinermut inatsisitigullu ikiorneqarnissamut ikiorneqarluarpoq.

Kulturikkut kingornussarsiat pingaartillugit

– Naak Danmarkimut nuunnitta kingorna Kalaallisut oqaatsikka annaagaluarlugit, Kalaallisut tunuliaqutaqarnera kultureqarneralu ilusilersuisarninnut isumassarsiortarninnullu kajumissaataajuaannarsimapput, tassa London College of Fashion-imi aamma Skrædder Akademimi Aarhusimiittumi ilinniartuunera sioqqullugu tamatumalu kingornagut, Nickie Isaksen Sermitsiameersumut taama oqaluttuarpoq. Sermitsiameersup Nickie arnaalu Rita, Larsbjørnsstræde 11-mi pisiniarfiannut pulaarpai.

Naggueqatigiit Inuit kakiorneri isumassarsiorfigalugit, toornerit titarnerillu atisaliaanni assigiinngitsuni takuneqarsinnaajuaannarput.

– Kalaallisut tunuliaqutaqarnera tulluusimaarutigaara, suliarisama tamarmik tamanna oqaluttuassartaraat. Tassaagama Inuk Kalaallit Nunaanneersoq paasilluarpara. Ilusilersuininni suminngaanneernera sorlaqarfigalu takutissallugit, kinaassutsinnut pingaaruteqarpoq. 

– Oqaluttuarisaaneq assassortarnerlu atisaliortarnitsinni qitiusumik ilaajuarsimapput, pitsaassuserlu suliamut tunngaviusoq peqataatillugu. Ullumikkut annerusumik qiviunik aamma nuersagassanik atuilluta suliaqartarpugut, iluarinartuullutillu sivisuumik atasinnaasunik.

Suliffeqarfiup piffissap ingerlanerani ineriartornerata kingunerisaanik pingaarnertut suliarisartakkavut pingaarnerutilerpavut. 

- Nittartakkakkut ullumikkut tuniniaanerusarpugut, namminersortunik tuniniaasartunik suleqateqarluta takornarianullu pisiniarfinnut tunisisarluta. Tamatumalu saniatigut Canadami suliffeqarfimmut takornariartitseqatigiinnut angisuumut suleqateqalerniarluta aallarnisaleruttorluta.

– Tamatuma saniatigut Københavnip qeqqani pisiniarfittaarnissarput aalajangiukkatsigu, Strøgep Rådhuspladsillu eqqaanni, ilusilersuinermik suliaqartut nunanit tamalaaneersut akornanni, ilusilersuinermillu tuniniaavinnik, cafénik neriniartarfinnillu avatangiiseqartumi.    

Kalaallit piujuartitsillutik ilusilersuisarnerat

Isaksen Designip pilersinneqarneranut Nunatta oqaluttuarisaanerata piujuartitsilluni assassorluni ilusilersukkat atorlugit oqaluttuarinissaa siunertaavoq.

“Kalaallisut kingornussarsiavut, anersaakkut silarsuatsinneersut, pinngortitaq  oqaluttuarisaanerpullu isumassarsiorfigilluartarpakka, nittartakkamini allappoq.

Isaksenip ilusilersuisarnerani suliffeqarfiullu ilisarnaataani, Nickiemit 2003-mi suliarineqartumi qalipaatit pingasut atorneqarput — aappaluttoq, qaqortoq qernertorlu:

Qernertoq anersaat silarsuaannut ilisarnaataavoq, aappaluttoq aammut inuussutaasumut qaqortorlu siuaasat saarnginut ilisarnaataalluni. 

Ilisaarnaatitut assiliartaq nigaliuvoq inuunermut naassaanngitsumut assersuutaalluni, tassaammat piujuaannartoq aallartiffeqaranilu naaffeqanngitsoq, oqaluttuarpoq.     

Ineriartorneq soqutiginartoq

Anaanaq paninilu 2002-mi aallartimmatali anguniagaq angisuujuvoq. Kalaallit kusanartuliaannik assigiinngitsorpassuarnik, ilaatigut puisit amiinik tunisassianik, pinnersaatinik, taskinik, kamippannik assigisaanillu nioqquteqarniarput.

Tamatuma saniatigut Danmarkimi, Nunatsinni, nunani avannarlerni USA-mi Canadamilu pisiniarfippassuarnik tuniniaaffiusussanik ineriartortitsisoqarpoq. 

Aamma atisanik takutitsinerni peqataasarnissaq, aamma tamakkunani tamatigut kalaallisut ilusilersukkat pingaartinneqarnissaat siunniunneqarluni.  

– Atisaliornermi mutit malinnaaffiginngisaannarsimavakka, aamma qalipaatit ilusilersukkallu nutaaliaasut malittuaannanngilakka. Kalaallit anersaavat kulturiallu aallaavigalugit ilusilersuisarpunga, soorlu kakiornerit, nanoq, qajaq, ulu, qalipaatit assigisaallu atorlugit, ilusilersuininni akuleriissittarlugit. 

USA-mi niuerneq ukiorpassuarni aamma ingerlanneqarpoq, New Yorkimi atisanik takutitsinerit peqataaffigineqartarlutik. Tassani Isaksen nioqquteqartartunik arlalinnik suleqateqalerpoq, ilaatigut Takashimaya 5th Avenuemiittoq, Washingtonimi Chicagomilu pisiniarfiit aamma Canadami pisiniarfiit arlallit. 

Ukiuni 2009-mit 2017-imut nittarsaassineq Kalaallit anersaavannik taaneqarpoq. Tamanna ullutsinni qanoq tiguneqarsimassagaluarnersoq eqqarsaatigissallugu soqutiginarpoq, oqarpoq. 

– Piffissami tamatumani oqaatsit taakku USA-mi, Canadami nunanilu allani nuannarineqarluarput, Danmarkimili tamanna siaruarsimannginnerulluni. Tamaani suleqatima siunnersuutigaat Qallunaatut ilusilersukkatut nittarsaateqqullugit. Uannulli pingaaruteqarami kalaallinit kingornussarsiat atorlugit erseqqissumik malittarinissaat – ukiunilu tamani taamaassimavoq, taama erseqqissaavoq. 

– Internetikulli ineriartorneq pissutigalugu, ingammik coronap kingorna, qarasaasiakkut tuniniaasarneq maanna pingaarnerutipparput Danmarkimilu pisiniarfiit aalajangersimasut ikittuinnaat attaveqarfigiuarlugit.

Internetikkut atisanik tuniniaasarneq siuariartorpoq, tamannalu pingaartumik pisiniarfinnut mikisunut, ulluinnarni tunisaqartarnerminnik tunngaveqartunut eqquivoq. 

- Maluginiakkatsitut pisisartut — allaat pisiniarfitsinnut qanittumiittut — pisiniarfimmut maanga ornigunnissaminnit internetikkut pisiniarlutik poortukkamik aallertarfimmut aallernissartik nuannarinerusarpaat, Nickie oqaluttuarpoq.

- Pissutsit taama ineriartornerat pissutigalugu pisiniarfiit mikinerit ilaat isumaqatigiissuteqarfigisimasavut taamaatiinnartariaqarsimavavut.

- Niuertarfiit aallaqqaammulli peqataasimasut niuernerup allanngorneratigut taamaatiinnarneqarnerannik oqarfiginissaat ilungersunarsimavoq, taamaattorli pissutsit taamaallutik. 

- Ineriartornerup kingunerisaanik sumi qanorlu tuniniaasarnitsinnut tunngatillugu aamma qanoq amerlatigisunik nioqqutissaateqarnitsinnut tunngatillugu sammisavut allanngorput.

- Taamaalilluta internetikkut tuniniaanerusalerpugut, pingaarnertullu nioqqutissiaativut piumaneqarluartut qitiutilerlugit.

- Taamaattumik atisanik takutitsinernut akisuunut, ullumikkut niuernitsinnut pingaaruteqarpallaanngitsunut aningaasartuutaaginnartartunullu peqataaneq ajorpugut, oqaluttuarpoq.

Kikkut nioqqutissiassinnik internetikkut pisisarpat?

– Danmarkimi Kalaallit Nunaannilu tunisaqarnerusarpugut, aammali nunanut avannarlernut, Canadamut Europamullu tunisisarluta, Nickie oqaluttuarpoq oqaatigalugu umiarsuarnut takornariartaatinut ilaasut pingaaruteqarluinnartut.

Naggueqatigiit Inuit kakiorneri, tupilaat nannullu nuersakkatut assilineri nuannarineqarluartut oqaatigaa, nangillunilu oqaatigalugu nunarsuarmioqataajartortilluta kulturerput kinaassuserpullu pingaaruteqarneruleraluttuinnartut. Tamanna inunnut kikkunnut tamanut atuuppoq.

Kalaallit Nunaat

 Kalaallit Nunaannimi? 

- Kalaallit Nunaanni Anita Høeghimik Mia Chemnitzimillu aamma taakku pisiniarfiutaat Qiviut suleqatiginiarlugit aallarnisaleruttorpugut, tunisassiavullu tassani tuniniarlugit. Taamatuttaaq nuna tamakkerlugu takornarianut pisiniarfinni, mittarfinni, Air Greenlandimi il.il. tuniniaavugut. Pisiffiup atisaarniarfiinik siusinnerusukkut suleqateqarsimavugut. Misilittakkalli takutippaat, uagut tunisassiavut pitsaanerpaamik tunineqartartut, saqqummersinnissaannut  periarfissaqarluartuni, tassanilu periarfissat assigiissimanngillat. 

- Katuami siorna atisanik saqqummersitsivugut. Taanna iluatsilluaqaaq. Uagut oqaluttuassartarput, takorluukkavut, aamma kalaallit anersaavat tunisassiani ersersinneqartartoq oqaluttuaraakka. Saqqummersitsinermi ernerput angajulleq nipilersornermik, ilusilersuinermik, aamma saqqummiinermik suliaqarluarpoq, aamma aaqqissuussinermut pingaarutilimmik peqataavoq. Tamanna tulluusimaarutigaara, oqaluttuarpoq.