Sakkutuunngorniat siulliit Kalaallit Nunaanni suliaqaleruttortut

Sakkutuunngorniat siullerpaamik Kalaallit Nunaannut aallartinneqarput. Illersornissaqarfik nittartakkamini taama allappoq.

Sakkutuunngorniat taakku Slesvigske Fodregimentimeersuupput, februaarimilu sivitsukkamik sakkutuunngorniarlutik aallartittut siulliit ilagaat.

Krab 19-inik ukiulik Københavnimeersoq peqataasinnaagami qujamasuppoq.

- Kalaallit Nunaanni misilittagaqarsinnaaneq nuanneqaaq. Aallartinnata sivikitsumik aasaanerani sulinngiffeqarpugut. Nuanneraluartoq amerlanertigut aallarniassagatta aallarteqqinnissarput qilanaaraara, Krab oqarpoq.

Qaammatini aqqanilinni sakkutuunngorniartussat siulliit Slesvigske Fodregimentimeersut aggustip aallartinnerani illoqarfiit pingaarnersaata Nuummi mittarfianut tikipput.

Sakkutuunngorniat siullerpaamik sungiusarnermi Arctic Endurance-mi sakkutuujunerminni sungiusartinneqarlutillu sakkutuutut piginnaanitik nakussatsissavaat.

Sakkutuunngorniat aallaqqanerminni immikkoortinneqarput, ilaat Kangerlussuarmiittut allat Nuummiipput.

Sumiiffinni taakkunani marlunni kiffartornermut pingaarutilimmik suliaqartussaapput.

Sakkutuutut suliassamik naammassinninneq illersornissamut isumaqatigiissummut atatillugu sivitsukkamik sakkutuunngorniarnermut ilaatinneqarpoq.

Ilaatigut sakkutuut suliassanut allanik imaannaanngitsunut atorneqarsinnaalersillugit amerlanerusunik sakkutooqalernissaq siunertarineqarpoq.

Sakkutuunngorniat Kalaallit Nunaanniinnerminni suliassat sakkutuunut tunngasut kisiisa suliarissanngilaat. Sungiusarnermimi piginnaasat maannamut ilikkakkatik pinngortitami allaanerulluinnartumi sungiusarneqassapput.

Kangerlussuup, issittup killeqarfiata avannaaniittup, pinngortitaata qaqqanik sivingarnilinnik, narsaamanernik orpeqanngitsunik ulikkaarnini assigiinngitsorpassuarnillu ujaraqarnini ilisarnaatigaa.

Orpippassuarnit sakkutuunngorniat sungiusarfiinit allaanerulluinnarpoq.

- Nunarsuarmi maannakkut taama inissisimasoqarnera pissutigalugu issittumi nunap pissusiinik sungiussiniarnerusariaqarpugut, tamannalu maaniitilluta ilikkassavarput. Sakkutuutut pisuinnartut Danmarkip pinngortitaaniikkaangatta orpippassuarniikkusunnerusarlutaluunniit pinngortitami toqqorfissalimmiikkusunnerusarpugut.

- Maanili nuna ammaannartuuvoq, taamaammat sakkutuut issittumi toqqorniarnissaq ilinniartariaqarpaat, Laura, kaptajni sakkutuunngornianullu pisortaq, oqarpoq.

Sakkutuunngorniat pinngortitami allaanerusumi sungiusartarnertik sungiusimavaat.

- Pinngortitaq eqqarsaatigigaanni maani suut tamarmik allaanerulluinnarput, nunamilu angalaneq allaanerulluinnarpoq. Maanimi sivingasuupilussuarnik sivinganersaqarpoq, tamannalu niukkut malugineqarsinnaavoq, 20-nik ukiulik Clemmens Aarhusimeersoq oqarpoq.

Kalaallit Nunaanni sungiusarneq naammassippat sakkutuunngorniat ilinniakkaminnik Danmarkimi nangitsissapput, tassani ilisimasatik misilittakkatillu ineriartortissavaat.

RITZAU