Sarfaarunnikuunera naluttarfimmut suli ajornartorsiortitsivoq - sisamanngornermi ammaqqissaaq
Nuummi naluttarfik Malik januaarip 24-ani sarfaaruttoqarnerata kingorna atortutigut suli ajornartorsiuteqarpoq.
Naluttarfik Malik sarfaaruttoornerup kingorna atortutigut ajornartorsiuteqarluni januaarip 25-aniilli matoqqavoq.
Toqqorsivimmit: Naluttarfik Malik
Nutarterneqarpoq: Naluttarfimmi atortorissaarutit ajoqutillit pingasunngonermi suliarineqarmata sisamanngornermi ammaqqittussanngortoq, Naluttarfimmiit Facebookikkut nalunaarutigineqarpoq.
"Taamaattorli atuisut piareersimaqqussavagut Naluttarfik Malik suli silaannarissarfinnik ajornartorsiuteqarnera pissutigalugu ullormiit ullormut Naluttarfik Malik matoratarsinnaammat," naluttarfimmiit allapput.
Naluttarfiup Maliup qaqugu ammaqqinnissaa suli nalunarpoq.
Nuummi nalunaaquttap akunnerini arfinilinni sarfaqanngereernerup kingorna naluttarfik suli ammaqqinngilaq. Imermut akuutissalersuut PLC-imik taaneqartartoq sarfaaruttoornermi aserorpoq.
- Imeqarnermut atortup nutaap ulluni qaninnerni tikinnissaa naatsorsuutigineqarpoq, ikkunneqareerpallu ajunngitsumik ingerlalernersoq misissorluarneqassaaq, naluttarfiup Facebookimi quppernerani taama paasissutissiisoqarpoq.
Aamma silaannarissarfiit ajorteqattaarnerat pissutaalluni saunartarfik, helsekabine kiisalu ini aalarfiusoq aamma matoqqapput.
Ajornatorsiutit aaqqiviginiarlugit tamaviaarluni sulisoqartoq, kingoraartissallu nunanit allamiit Nuummut nassiunneqartariaqarnerat ilaatigut aamma pissutaasoq, paasissutissiissutigineqarpoq.
- Nutaanik paasissutissaqalerpat ingerlaannaq nalunaarutigissavarput.Qujanaq paasinninnernut, Naluttarfik Malimmiit allapput.
