SIK-mi Nakkutilliisoqarfiup siulersuisuunerinit nalunaarut: Ilaasortat arlalissuit soraarninnguliivissut

SIK-mi ilaasortat siornamut sanilliullugu amerleriarsimagaluartut, SIK-p ilaasortai untritilikkaat siunissami qanittumi soraarninngornissaat misissuinermi paasineqarsimavoq.

SIK-mi ilaasortat 2026-mi apriilip 30-iani siornamut sanilliullugu 323-nik amerleriarlutik 5047-nngorsimasut SIK-mi Nakkutilliisut paasissutissiipput.

Soraarninngortussat amerliartortut

Taakkunannga 862-it ukiut pingasut arfineq-pingasullu qaangiussimalerpata soraarninngorumaartussatut naatsorsuutigineqartut kisitsisit takutippaat.

SIK-p ilaasortani soraarninngoriaannaasut nalunaarsorsimavai. SIK-mut ilaasortaasut 206-iusut ukiormanna soraarninngoriaannaasut aamma ukiuni tullerni marlunni soraarninngoriaannaasut 251-iusut nalunaarsorneqarsimapput.

Tassa ilaasortat katillugit 1.319-it ukiut arfineq-pingasut ingerlaneranni soraarninngoriaannaasut naatsorsorneqarsimapput.

Nunaqarfiit illoqarfiillu sorliit inerisarneqassappat?

SIK-p nakkutilliisoqarfiata nalunaarusiaa tunngavigalugu nunatsinni innuttaasut Kommuneqarfik Sermersuumut nutsernerat tunngavigalugu kommunit sinneri inukilliartorput.

Naatsorsueqqissaartarfiup siunissamut Nunatsinni innuttaasunik naatsorsuisimanerat 2026-mi apriilip 23-ni saqqummiunneqartoq tunngavigalugu innuttaasut ikiliartornerata tupinnanngitsumik assaat sulisussat ikiliartornissaanik SIK-p siulersuisuunerinit nalilerneqarpoq.

- Uteqqippara, allatut ajornartumik nuna tamakkerlugu pilersaarusiortariaqarlerpugut. Nunaqarfiit illoqarfiillu sorliit inerisaavigineqarniarpat? SIK aperivoq.

Meeraaqqatut uteriiserneq

Donald Trumpip, USA-p Præsidentiata, Præsidentitut atuuffimminut siullermut sanilliullugu uteriisernerulluni Kalaallit Nunaat tiguarumallugu sukataaruteqarnera, SIK-mit maluginiarneqarportaaq.

- Trump kingumut tamatumuuna kingullerminngarnit sukataarunnerullugu Nunarput tigujumallugu meeraaqqatut uteriiseqqilerpoq, SIK nalunaarusiamini allappoq.

Inuit ataasiakkaat aqqutigalugit Kalaallit ilaat USA-mut atatinneqalernermikkut suna tamarmi aaqqinneqarnissaannik innuttaasut uppertinneqarnerat uparuarneqarpoq.

- Inuit ataasiakkaat ilaat oqaatigineqartariaqarput Nunatsinnut asangaakkatsinnut killuussisuusut, pisullu qaangiuppata nunatsinnut killuussisuunersut misissorneqartariaqarpoq, SIK allappoq.

SIK-mi siulersuisuunerit nalunaarutaat suli arlalinnik imaqartoq, pingasunngornermi ataatsimiinnermi peqataasunut saqqummiunneqassaaq.