SIK-p ukiuni 70-nngortorsiornini Ilulissani nalliuttorsiutigileraa

SIK-p Nakkutilliisoqarfia Ilulissani ataatsimiittussanngorpoq, taamatullu ukiut 70-nngortorsiorneranni nalliussisitsissalluni.

Katinngatilisaarluni Ilulissani kulturikkut illorsuup Sermermiut eqqaaniit arsaattarfimmut pingasunngorneq juulip aallaqqaataani nalunaaqutaq marlunut ingerlaaqatigiittoqassaaq.

Arsaattarfimmi oqalugiartoqarluni, nipilersortoqarlunilu aliikkusersuinerit ingerlanneqassapput.

- Iluliarmiut tamatumunnga peqatiserivagut, SIK allappoq.

SIK-p Nakkutilliisoqarfia

SIK-p Nakkutilliisoqarfiata ataatsimiinnera kattuffiup ataatsimeersuarnerisa akornanni ingerlanneqartarpoq, ataatsimiinnerlu immikkoortortaqarfinniit peqataaffigineqartoq marlunngornermi juunip 30-ni Ilulissani ingerlanneqassaaq.

Nakkutilliisoqarfiup ataatsimiinnerani oqaluuserisassat ilaatigut tassaapput SIK-mi siulersuisuunerit nalunaarutaat, peqatigiiffinniit siunnersuutit aamma kattuffiup 2025-mut naatsorsuutai tunngavigalugit SIK-p aningaasaqarnera pillugu ilisimatitsineq.

Taassuma saniatigut Danmarkimi sulisartut kattuffiisa kattuffissuanniit Fagbevægelsens Hovedorganisation (FH)-miit siulittaasup tullia Nanna Højlund oqalugiassaaq. USA-milu suliffissuaqarnermi sulisartut kattuffiisa kattuffissuata (American Federation of Labor and Congress of Industiral Organizations, AFL-CIO) pisortaa Cathy Feingold, videokkut inuulluaqqussuteqassalluni, SIK allappoq.