Silaannaq nillertoq Umimmaat Nunaata tungaaninngaanneersoq sineriatsinnik nillertitsivoq

Silaannarsuarmi 10 kilometerisut qutsitsigisumi silaannaap sarfaliornera peqqutigalugu Umimmaap Nunaanit (Ellesmer Islandimiit, aaqq.) silaannaq nillertoq qummukartarpoq, Kalaallit Nunaatalu kitaata tungaanut ammut ingerlaartarluni.

- Taamaattumik silaannaq nillerneruvoq aamma sumiiffiit ilaat aasaagaluartumi apisarput, Flemming Geisler-Skou, DMI-p nunatsinni atorfilittaa nassuiaavoq.

Silaannaap ingerlaartuartarnera pissutigalugu, kitaa piffissap ilaani nillernerusarnera naliginnaasuusarpoq.

- Silap pissusiata allanngoriartornera massakkut nillerneranut pissutaanngilaq, Flemming Geisler-Skou nassuiaavoq.

Europap kiassuaarnera nunattalu nillertinnera

DMI-p paasissutissiinera naapertorlugu nunarsuaq assigiimmik kiatsikkaluttuinnanngilaq, sumiiffiillu silaannaat ilaat naliginnaasumiit kiannerupput, sumiiffiillu allat naliginnaasumiit nillernerullutik.

Europa, Danmark ilanngullugu, massakkut kianneruvoq, peqatigisaanilli Kalaallit Nunaat naliginnaasumiit nillernerulluni.

- Silap pissusiatalu allanngoriartornera pissutigalugu kiarujussuartoqartarnera siornatigornit akulikinnerujartuinnarlutillu sakkortunerulerput, Flemming Geisler-Skou allappoq.

Aasap sinnerani nunatsinni oqorsarsimanerusariaqarnersugut aamma paasiniaagaluarpugut. DMI-lli aasaanerani sapaatit akunneri arlallit sioqqullugit silassamik ilimasaaruteqartarunnaarsimanerarpoq.

- Siunissami qaninnerusumi aatsaat silassaq nalilerneqartarmat, piffissaq ungasinnerusoq eqqarsaatigalugu sila tutsuiginartumik ilimasaarinissamut nalorninartorujussuummat oqaatigisinnaanngikkallarpara, Flemming Geisler-Skou naggasiivoq.