Siumut Kuannersuit pillugit itigartitsisoqareersorlu: Aningaasat nutaat suminngaanniissagamik?

OBS: Allaaserisap qulequtaa apersorneqarnermut tulluarsarlugu, eqqornerusumut allanngortinneqarpoq nal. 09.42. Kukkunerput ajuusaarutigaarput.

Narsap Iluani, Kuannersuarni, aatsitassanik ujaasinissamut misissueqqissaarnissamullu, Energy Transition Mineralsip akuersissutaa,  2025-ip naanerani atuukkunnaartoq, sivitsorneqassanngilaq. Ingerlatseqatigiiffiup sivitsuinissamik kissaateqarluni qinnuteqaataa, Naalakkersuisut sisamanngornermi juunip 25-ani itigartippaat.

Tamanna Siumup siulittaasuata iluarinngeqaa. 

- Siumup Kuannersuarni misissueqqissaarnissamut akuersissutaateqarneq tamakkiisumik tapersersortuaannarnikuuaa, aamma suli tapersersorparput. 

- Isumaqarpunga Naalakkersuisut itigartitsinermikkut nunatta aatsitassarsiorfiusinnaasutut misissueqqissaarnerni pitsaasumik atugassaqartitsinera illuatungilerneqartoq, Aleqa Hammond Sermitsiamut oqarpoq.

Siumut angertuusoq

Taassuma partiip siuttuuffigisami uranimut apeqqummi qanoq inissisimanera erseqqissarpaa:

- Apeqqutaatinnagu uranitaqarnersoq uranitaqanngitsorluunniit nunatta aatsitassarsiornissaanut Siumut angertuuvoq.

- Uranimut ersisoqarniarpat taava qummut killiliussaq isumaqatigiinniutaaniarli. Nunarput alloriaqqittariaqarpoq. Sunulluunniit allanut akissaqanngitsutut imminut suaarutigisaqattaarunnaarluni, Aleqa Hammond oqarpoq.

Siumup ataatsimeersuarnermini anguniagassatut aalajangiussai naapertorlugit uranimik akulinnik aatsitassarsiortoqarnissaa ammaffigineqassaaq.

AAMMA ATUARUK:

Kuannersuarni aatsitassarsiornissamik sulissutillit oqartussat aalajangiinerannut: Naapertuilluanngitsuliornerujus-suuvoq

Naalakkersuisut qinnuteqaammik itigartitsinerminni tunngavilersuutaat Siumup sullugai. Taamaattumik Naalakkersuisunut peqqusipput.

- Naalakkersuisut itigartitsiniarunik minnerpaamik inuiaqatigiinnut tikkuussisariaqarput aningasaq nutaaq suminngaanniit aaniarnerlugu, Aleqa Hammond oqarpoq.

Sermitsiap aatsitassanut naalakkersuisoq, Múte B. Egede (IA), isornartorsiutit pillugit attaveqarfigaa. Allaaserisalli suliarineqarnerani tassanngaanniit akisoqanngilaq.

Naleraq: Ajuusaarnaq

Illuatungiliuteqataasut, Naleqqakkut, Naalakkersuisut aalajangiinerannut aamma pakatsipput.

- Tutsuiginassutsimik takutitsinnginnermik Naalakkersuisut takutitsipput. 

- Kalaallit Nunaata nunarsuarmi niueqatigiinnermi tutsuiginartutut isigineqarunnaartussaanera ajuusaarutigaarput, Pele Broberg Sermitsiamut oqarpoq.

Kalaallit Nunaat Danskit tunngaviusumik inatsisaannut ilaatillugu aatsitassarsiornissaq taakkua piffissaasorinngilaat.