Sophie Hæstorp Andersen: Saammaasseqatigiinnissamut suliinnassaagut

Danmarkimi qinersiviit matusimalerput, isumasiuinerillu siulliit takutippaat Socialdemokraatit Venstrelu, maanna naalakkersiusuutitaqarsimasut, kinguariangaatsiassasut.

Sermitsiap isumaginninnermut ineqarnermut ministeriusimasoq Sophie Hæstorp Andersen (Soc.) Folketingimi ilaasortanngortussat Kalaallit Nunaanneersut sulinerat inissiisarnerlu pillugit oqaloqatigaa:

– Kalaallit Nunaat suliassaqarfinnik amerlasuunik, ilaatigut isumaginninnermik, akisussaaffinnik tigusisimagaluartoq, qularutissaanngilaq ukiuni kingullerni qanimut oqaloqatigiillualersimanerput. Naalakkersuisut ataatsimeeqatigigaangakkit Kalaallit Nunaanni Danmarkimilu kalaallit ilaqutariit akornanni ajornartorsiutit ammasumik oqaloqatigiissutigisarpavut. Suliat taakku ammasumik oqaluuserileratsigit ataatsimoorluta aaqqiissutissarsinissamut periarfissaqalerpugut.

– Assersuutigalugu isumaqarpunga ataatsimut aaqqiissutissarsisimalluta angajoqqaat piginnaaneri pillugit misissuinermi tarnip pissusaanik misilittakkat nalinginnaasut atorunnaarsillugit. Angajoqqaarsianut tunngasunik aaqqissuusseqqittoqarnissaa qanillivoq, aamma kalaallit meeqqat angerlarsimaffiup avataanut inissinneqarsimasut kulturiminnut oqaatsiminnullu attaveqartuarsinnaanissaat qulakkeerniarlugu suliniuteqarpugut. Aammattaaq angajoqqaarsianik kalaallinik amerlanerusunik atorfinitsitsisariaqarpugut.

– Isumaqarpunga ataatsimoorutta nukittunerusugut. Saammaateqatigiinnissamut suliaqarnissarput tullinnguuppoq, sulilu suliassarpassuaqarpoq suliarilluarneqarsimasunik, ilaatigut inatsisitigut ataataqanngitsut inuusuttullu kalaallit Danmarkimi peroriartorsimasut nunaminnut attaveqarunnaarsimasut pillugit suliat, Sophie Hæstorp Andersen oqarpoq.