Stine Egede: Qulequttat annertuut akisussaaffigissavakka

Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisunngortup piffissami aggersumi sukannersumik, pingaarnersiuineq ingerlatissavaa.

Stine Egede Inuit Ataqatigiit sinnerlugu Naalakkersuisunut ilaasortanngorpoq.
Saqqummersinneqarpoq

Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfik nutaamik Naalakkersuisoqalerpoq.

Stine Egede (IA) Maritha Brobergimut (A) sapaatip-akunnerani kingullermi tunuartumut, kingoraartaavoq.

- Eqqarsaatigeqqaarlugu akuersivunga, nunatsinnummi tunniussassaqarluarlunga suliumavunga Stine Egede Inatsisartunit ivertinneqarnermi kinguninngua Sermitsiamut oqarpoq.

Kommune Kujallermi Inuit Ataqatigiit sinnerlugit kommunalbestyrelsimut ilaasortap, Kommunalbestyrelsimi sulinngiffeqarnissani qinnutigalugu oqarpoq.

- Qulequttat annertuut akisussaaffigissavakka. Naalakkersuisut ilaatigut amigaataanerat pissutigalugu suliassat ilaat nukiginnarput, piffissamilu aggersumi pingaarnersiuilluinnartariaqarpunga.

Suliassat amerlasuut, suliassanullu ilisimasassat amerlasuut, sulilersinnani ullumikkut misissussallugit Stine Egede oqaluttuarpoq.

Kommune Kujallermi Inuit Ataqatigiit sinnerlugu kommunalbestyrelsimut ilaasortanngorluni, Stine Egede siullermeerluni 2013-imi qinigaavoq. Inatsisartunut 2018-imi qinigaavoq, Kommune Kujallermi 2021-mi borgmesterinngorpoq. Kommunimut 2025-mi qinersisoqarnerani borgmesteritut ajorsartinneqarpoq, kommunalbestyrelsimili ilaasortaaginnarluni.

Powered by Labrador CMS