Suila-tapit naatsorsorneqarnerini kukkunernik nassaartoqaqqittoq

Akileraartarnermut Aqutsisoqarfiup Suila-tapit pillugit ukiumut naatsorsuutit nutaat ullumi sisamanngornermi nassiuttussaagaluarpai. Tamannali pisinnaanngilaq, kukkunerimmi allat nassaarineqarmata innuttaasut sivikinnerpaamik sapaatip-akunnera ataaseq utaqqeqqittariaqalerput.

Innuttaasut 7.161-t Suila-tapisivallaarsimagamik akiligassaqarnerminnik aggustip 20-ani nalunaarfigineqarput. Qasserpiaalli akiligassaqarnersut maannamut suli ilisimaneqanngilaq. Innuttaasut qassit akiligassaqarnersut paasiniarlugu Akileraartarnermut Aqutsisoqarfik naatsorsueqqittariaqalerpoq.

Assiliisoq: Klaus Bo Christensen/Ritzau Scanpix

Arnaq Nielsen Arnaq Nielsen Tusagassiortoq

Saqqummersinneqarpoq 10. Septembari 2026 - 12:46

Ussassaarut

PAASISSUTISSAT NUTAAT: Akileraatarnermut Aqutsisoqarfik sisamanngornermi ualikkut nutaamik nalunaaruteqarpoq - allaaserisaq uani atuarsinnaavat: Akileraartarnermut Aqutsisoqarfiup kukkuneq nassaaraa: Suila-tapit pillugit naatsorsuutit nassiussuinnalerpaat

Innuttaasut 7.161-t Suila-tapisivallaarsimagamik akiligassaqarnertik e-Boksikkut aggustip 20-ani allagarsissutigaat.

Suila-tapilli naatsorsornerini arlalinnik kukkusoqarsimammat naatsorsueqqittoqartariaqalersoq Akileraartarnermut Aqutsisoqarfik septembarip aappaani nalunaarpoq. Taamaalilluni innuttaasut 22.000-t tungaanoortut naatsorsuutaat misissoqqinneqartussanngorput.

Naatsorsueqqinneq ullumi septembarip qulingani naammassereertussaagaluarpoq, innuttaasullu akiligassaqarnerlutik utertuussanerlutilluunniit paasisussaagaluarpaat.

Tamannali pissanngilaq.

Ussassaarut

Kukkuneq alla Akileraartarnermut Aqutsisoqarfiup nassaaraa, taamaalilluni ukiumut naatsorsuutit nassiunneqaqqinnissaat kinguartinneqaqqippoq.

Sivikinnerpaamik sapaatip-akunneranik ataatsimik utaqqisariaqarput

Kukkuneq alla, ullumi, ukiumut naatsorsuutit nassiunneqarfissaraluani paasineqarpoq.

AAMMA ATUARUK

Akileraartarnermut Aqutsisoqarfik Suila-tapit kukkuneqarneri pillugit: Kukkunerput nassuerutigaarput

Soraarnerussutisiassat nalunaarsornerini kukkusoqarsimavoq. Soraarnerussutisiassammi sulisitsisunit soraarnerussutisiassaqartitsivinnillu nalunaarsorneqartarsimapput. Taamaalilluni marloriaammik nalunaarsorneqarsimasinnaallutik.

- Innuttaasut qassit kukkunermit kalluarneqarnersut suli paasiniarparput. Ukiumut naatsorsuutinik kukkunilinnik nassiusseqqikkumanata qulakkiiveqqaarlugu nassiussiumaarpugut, Akileraartarnermut Aqutsisoqarfimmi attaveqatigiinnermut aqutsisoq Søren Würtz Sermitsiamut oqarpoq.

Taamaattumik innuttaasut tusindilikkuutaat naammagittaqqittariaqarput.

- Naatsorsuutigaara sivikinnerpaamik sapaatip-akunnera ataaseq aatsaat qaangiuppat nassiussiumaarluta, Søren Würtz oqarpoq.