Suliffeqarfinni aqqaneq marlunni sulisut soraarnerussutisiassatut 870 millionit koruuninik katersisut

Kalaallit Nunaanni suliffeqarfiit sulisuminnut soraarnerussutisiassanik ileqqaarluartarput. 

Soraarnerussutisiat pillugit suliffeqarfik siunnersuisartoq, WTW, naapertorlugu suliffeqarfiit aqqaneq-marluk sulisuisa 3700-it missaanniittut ukioq manna apriilip aallaqaataat ilanngullugu aningaasat soraarnerussutisiassat 870 millionit koruunit katersorsimavaat. WTW tusagassiorfinnut taama nalunaaruteqarpoq.

Namminersorlutik Oqartussat ingerlatseqatigiiffik pigisaat, Air Greenland, katersititsisartunut akuuvoq. Taanna 650-it missaannik sulisoqarpoq. Ingerlatseqatigiiffiup sulisoqarnermut pisortaata oqarnera naapertorlugu sulisut soraarnerussutisiassanik katersinerat pingaaruteqarpoq. 

- Soraarnerussutisiassat pillugit isiginnittaaseq allanngoriartorpoq. Tamanna inuusuttut akornanni takuneqarsinnaavoq, siornatigut aningaasanik soraarnerussutisiassanut ileqqaarneq soqutigineqarpallaanngilaq.

- Inuusuttut amerlasuut immaqa ilaqutsiorusupput, aningaasallu najugaqalernermut atorusullugit. Kisianni tassani akileraarutitigut aaqqiissutissamik nassaarpugut, uagut sulisorlu akornatsinni procentit annikitsumik nikisissinnaallugit, taamaalilluni akileraarut akilerneqartussaq annikillisarneqarluni toqqaannartumillu soraarnerussutisiassanut ilanngaatigineqarluni. Tamanna aningaasat ileqqaarnissaat ajornannginnerulersippaa naammaginartinnerulersillugulu, Mads B. Christensen tusagassiorfinnut nalunaarummi allappoq.

Soraarnerussutisiassanik katersineq sungiusimaneqarpallaanngitsoq

Inatsisartut soraarnerussutisiassanik ileqqaartussaatitaanermut inatsit 2018-imi aalajangerpaat. Naalakkersuisut naapertorlugit, Kalaallit Nunaanni innuttaasut ukiumut 125.000 koruuninit isertitaqarnerusut soraarnerussutisiassanut katersaat ukiumut 1 milliardi koruunit missaanniittarput.

Tommy Ege Kristensen, Cadvi ApS-imi piginnittuullunilu pisortaavoq. Suliffeqarfik Nuummi sulisoqarnermut tunngasunik siunnersuilluni suliaqarfiuvoq. Pisortap oqarnera naapertorlugu Kalaallit Nunaanni soraarnerussutisianik katersinerup eqqummaariffigineqarnerulernera pitsaasuuvoq. Ileqqaarnermulli suli apeqqusiisartunik peqartoq taanna aamma isummerpoq. Tamanna ileqqaartarnerup nutaajunera peqqutigalugu naliginnaasuusoq taanna isumaqarpoq.

- Soraarnerussutisiassat Danmarkimi ilisimaneqartutut iluaqutissatut suli inissinngillat, kisianni aatsaat kinguaariit soraarnerussutisiallit siulliit, ileqqaarsimasaminnik maanna iluaquteqalerput. Taamaalillutik soraarnerussutisiallit soraarnerussutisiassat pillugit ilisimasanik kinguaariinnut ingerlatitseqqittarnermut peqataalerput, aaqqissuussallu qanoq atorneqarsinnaanersut piviusumik allanut oqaluttuaralugit. Tamanna siornatigut periarfissaqarsimanngilaq, Tommy Ege Kristensen allappoq.

Suliffeqarfiit aqqaneq marluk sorliit pineqarnersut WTW-mit oqaatigineqarsinnaanngitsoq, suliffeqarfik Sermitsiamut ilisimatitsivoq. Tassani sullitat eqqarsaatigalugit isertuussisussaatitaasoqarnera tunngavilersuutigineqarpoq.