Sulisussaaleqinerup sinerissami nakkutilliissutip nunatsinnukarnissaanik taamaatitsineq kinguneraa

Sakkutuut umiartortut sinerissami nakkutilliissutip ”Hvidbjørnen”-ip nunatsinnut angalanissaanut pilersaarut inuttassaqannginneq pissutigalugu taamaatiinnarpaa.

Taama DR allappoq.

Seniorsergent Niels Pihlblad 1. Eskadremi, issittumi umiarsuit inissisimaffigisaani sinniisuuvoq. Kalaallit Nunaannukaqataasussaagaluarpoq.

- Isumaga malillugu sulisussaqannginneq pissutigalugu angalanissamik taamaatitsigaanni, tamanna politikikkut erseqqissumik oqariartornervoq, taanna DR-mut oqarpoq.

DR malillugu ”Hvidbjørnen” qaammatini marlunni ilaatigut Kalaallit Nunaata kitaata sineriaata avannaani angalasussaagaluarpoq. Taamattaarlu Amerikamiut Pituffik Space Baseata nalliuttorsiornerani peqataasussaagaluarpoq. 

DR TV2-llu upernaaq manna sakkutuut pappiaraataat aallaavigalugit sakkutuuni umiartortuni inuttassaaleqisoqarnera oqaluttuaraat.

DR apriilimi sakkutuut umiartortut quliugaangata atorfik ataaseq inuttaqarneq ajortoq allappoq. TV2-p pappiaqqami takusaani inuttassaaleqineq ”aarlerinartupilussuusoq” allassimavoq.

Illersornissaqarfik Kalaallit Nunaata Savalimmiullu eqqaanni umiarsuit sisamat atorlugit sinerissami nakkutilliinermik ingerlatsivoq – tassani ”Hvidbjørnen” ilaavoq.

Illersornissaqarfiup nittartakkakkut quppernerani umiarsuit 1989-mit 1992-p tungaanut sanaartorneqartut nassuiarneqarpoq, taakkulu ilaatigut Danmarkip oqartussaaffia illersorlugulu imaani annaassiniarnerni peqataasarput.

DR-p Issittumi Sakkutooqarfik Nuummiittoq ”Hvidbjørnen”-ip angalanissaa taamaatitaq pillugu arlalinnik apeqquteqarfigaa.

Tassanilu pingaarnersiuinissaq pisariaqartoq, allanulli nuussinerup aasap ingerlanerani suliassani pingaarnerutinneqartuni peqataasinnaaneq pisinnaalersikkaa oqaatigineqarpoq.

DR-lu naapertorlugu tassani ilaatigut amerikamiut sakkutooqarfiata ullorsiornera ilaavoq, tamatumanilu umiarsuaq minnerusoq ”Ejnar Mikkelsen” peqataatinneqassaaq.

"Ejnar Mikkelsen" illersornissaqarfiup angallatinik nakkutilliissutaasa ilagaat, taanna umiarsuarnit nakkutilliissutinit minneruvoq. ”Hvidbjørnen”-imullu sanilliullugu umiarsuaq helikoptereqanngilaq, sakkutuulli timmisartortartut helikopterii missinnaapput.

Issittumi Sakkutooqarfiup sakkutooqarnermi pissutsit pissutigalugit oqaaseqaqqikkumanngitsoq, DR allappoq.

DR-ttaaq illersornissamut ministeri Jeppe Bruus (S) apersorusussimagaluarpaa. Taassuma Illersornissamut qullersaqarfik innersuuppaa.

RITZAU