Taarseruttornerani tullimut asanninneq

Juullimi Jiisusip inunngornera nalliussisarparput, qaamanerulli uteriartoqqilernera aamma nalliussisarlutigu.

Meeqqat juulliaqqami katerisimaarnissaq nerilluarnissarlu qilanaarisarpaat, juullimili tunissutisinissartik qilanaarinerpaasarlugu.

Juullip qaammataa aamma tassaavoq pisiniarfiit aningaasarsiornerpaaffigisartagaat, juullimullu niuffanneq naatsorsuutit ukiup sinneranut oqimaaqatigiissinnissaannut niuertarfiillu ingerlaannarsinnaanissaannut aalajangiisuusinnaavoq. Juullimut tunissutissat pisiarineqartarput, juullimullu nerisassat pisiarineqartussaallutik, decembarimilu pisiassat allat tamarmik pisiarineqartussaasarlutik — soorlu juullip naneruutai, sapaassuarni tunissutissat, juullernissaanut ammartakkat, atisallu kusanartut julefrokostimi juullikkunnilu atisassat.

Angajoqqaajugaanili kisimiittoq, ilaqutariit SIK-p isumaqatigiissutai najoqqutaralugit akissarsiaqarpata imaluunniit utoqqalinersiuteqaraanni, tamakkorpassuarnut akissaqarnissaq ajornakusoorsinnaasarpoq.

Piffissami suut tamarmik akitsoriartorfianni inuuvugut — ineqarnermut akiliutit, innaallagiaq, imeq kiassarnerlu minnerunngitsumillu nerisassat atisallu ima akitsoriartortigipput, ilaqutariippassuit qaammat anigorsinnaajumallugu pingaarnersiuisariaqartarlutik aningaasaatiminnillu naammattusaarisariaqartarlutik. Inuit ilaat isertitatik naammanngimmata arlalinnik suliffeqartariaqartarput, allalli ikinngutiminnik ilaquttaminnillu imaluunniit ilisarisimasamik pisaannik isumalluuteqartariaqartarlutik.

Ilaqutariippassuit meerartallit amerlasuut ernumapput, meeqqaminnik nuannersumik juullisiortitsisinnaannginnertik ernumagalugu. Taamaattumik inuppassuit utoqqarnik ilaqutariinnillu pissakilliortunik ikiuiniartut takusarlugillu tusartaratsigik nuanneqaaq. Ilaasa utoqqaat kaageeraliuuttarpaat, allallu ilaqutariinnut juullimut nerisassanik tunisisarlutik. Aamma peqatigiiffiit ilaqutariinnik pissakilliortunik juullikkunni ikiuisartut amerlanerulersimapput. Assersuutigalugu Nanubørn, juullimut aviisimi matumani atuarsinnaasanni, ilaqutariinnut meerartalinnut aningaasatigut ikiorsiissutinik tunissuteqartarpoq.

Pingaaruteqarporli qanoq innerlutit allanut oqaatigisinnaassagit, ajornartoornermilu ikioqqusinnaanissat. Ikioqqulluni qinnuteqarneq sapiissuseqarnissamik piumasaqaatitaqarpoq, inuillu ilaannut killissamik qaangiilluni iliuuseqarnertut misinnarsinnaasarluni. Aammali nalunngilarput inuit amerlanerit nuannaarlutik ikiuerusuttartut avitseqateqarusuttartullu. Tamanna takujuaannarparput. Ikioqqulluni qinnuteqarnikkut annaasaqartoqarneq ajorpoq. Ajornartoornermi tullimut asanninneq inuppalaarnerlu erseqqinnerulersarput.

Juullimut aviisi manna nalinginnaasumik saqqummertartuni kingullersaavoq. Ukiumi nutaami Sermitsiaq AG-lu ataatsimoortinneqalissapput, sapaatillu akunnerata naanerani nittartakkami Sermitsiaq.AG-mi allaaserisat ilanngunneqartalissallutik. Aappaagu juullimut aviisi qanoq isikkoqassanersoq piffissap takutikkumaarpaa. Ukiut ingerlaneranni oqaluttuat nuannersut qutsatigerusuppakka. Apersortakkatta oqaluttuaminnik avitseqatiginnittarnerannut qujanaq. Atuartartunut aalajaatsunut aviisimik atuartuartartunut allaaserisatsinnillu atuartartunut qujanaq. Aamma eqqumiitsuliortunut pikkorissunut isumassarsiullaqqissunullu tamanut juullimut aviisitta saqqaanik suliaqartartunut qujanaq.

Qanortoq juullip pitsaasunik misigisaqartillisi uummatissinnilu eqqissinermik pilluarnermillu tunillusi.

Juullimi pilluaritsi.