Takornarissat nunanit allaneersut aqqutinut aalajangersimasunut pisuttuarsinnaanermut allagartaqartariaqarput

Nunanit allanit takornariat sumiiffinni aalajangersimasuni angalasinnaajumallutik angalanissamut akuersissummik imaluunniit angalanissamut allagartamik aamma angalanermut annaassiniarnermullu sillimmasiissuteqarnissamik, Naalakkersuisut kommunalbestyrelsit piumasaqaateqarsinnaaqqullugit periarfissikkumavaat.

Tamanna takornariaqarnermut inatsimmut allannguutissatut siunnersuutip, upernaakkut ataatsimiinnermi siullermeerneqartup, takutippaa. Siunnersuut nunanut allanut, inuussutissarsiornermut aatsitassanullu naalakkersuisumit Múte B. Egedemit saqqummiunneqarpoq.

Takornarissat Kalaallit Nunaata avataani najugaqartut angalanerminnik nalunaarsuinissaat sillimmasiisimanerallu uppernarsarnissaanik piumasaqarnissamut periarfissat maannakkut killeqarput, inatsisissatulli siunnersuutip tamanna qulakkiissavaa.

”Takornariartitsinermik ingerlatat ineriartornerisigut, matumani aamma

aqqutini navianartuni angallattoqarnerulerneratigut, ullutsinnut naleqqunnerusumik

upalungaarsimanissamik pisariaqartitsinerup isumaliutigineqarnissaanik

pissutissaqalersimavoq. Isumannaallisaaneq annertusissallugu Naalakkersuisut kissaatigaat,

ilutigisaanilli takornariartitsinermik ingerlatsinermut akornutaasinnaasutut

isigineqarsinnaasunik annertuallaanik piumasaqaasiornissaq nangaassutigineqarluni,” inatsisissatut siunnersuummut oqaaseqaammi allassimavoq.

Malittarisassat nuttaat saniatigut, takornariartitsisartut nunap immikkoortuani najugaqarnissamik piumasaqaatinik eqqortitsinissamut piffissaq sivitsorneqassaaq.

Isumannaallisaanermik ataqqinnittumillu pissusilersornermik tamanna siuarsaaqataasinnaavoq

Takornariat Sisimiut Kangerlussuullu akornanni Arctic Circle Trailimi 165 kilometerisut isorartutigisumik pisuttuartillutik qulimiguulimmik annaanneqartarsimasut allatigulluunniit isumannaatsumut anngunneqartarsimasut arlaqartut ukiut ingerlaneranni oqaluttuarineqarput.

Taamaattumik pisuttuarsinnaanermut allagartaqarnissamut siunnersuut Arctic Circle Businessimit, ilaatigut Qeqqata Kommuniani takornariaqarnermik ineriartortitsinissamik suliaqartumit, nuannaarutigineqarpoq.

- Pisuttunik nalunaarsuineq takornarianullu paasissutissiisarneq aqqutini takisuuni unamminiarnartunilu, soorlu Arctic Circle Trailimi, takornariat toqqissisimanerulernissaannut annaassiniarnernillu pitsaanerusumik tunngavissaqarnerulernissaannut iluaqutaasinnaavoq, Arctic Circle Businessimi destination manager Paninnguaq Fleischer-Lyberth Sermitsiamut allakkatigut akissuteqarluni oqarpoq.

Pisuttuarnermut allagartartaarnissamut akiliuteqartarnissaq pisariaqarpat, aningaasat sumiiffimmut aqqummullu akilerneqartumut utertinneqartariaqartut, aserfallatsaaliuinermullu atorneqartariaqartut, suliffeqarfik isumaqarpoq.

Nunap immikkoortuani pinngortitaq piniarnermut, aalisarnermut, assartuinermut silamilu aliikkusersornermut innuttaasunit atorneqartartoq, takornariallu pissusilersornerat, assersuutigalugu kuummi nunaqavissut aalisarfigisartagaanni qaqorsaatit takornarianik atorneqartarneri, pinngortitamut toqqaannartumik sunniuteqarsinnaasoq, Paninnguaq Fleischer-Lyberthip tikkuarpaa.

- Taamaattumik pisuttuarnissamut akuersissut imaluunniit isernissamut allagartaq takornarianut sumiiffimmi pissutsit, pinngortitap qanoq navianartiginera, ataqqinnillunilu pissusilersornissaq pillugit paasissutissiissutaasinnaavoq. Aaqqiissut tamanna isumannaallisaanermik aamma akisussaassuseqarluni takornariartitsinermik ineriartortitsinissamik tapersiissaaq, kiisalu sumiiffimmik ileqqutoqqallu malillugit atorneqartarneranik illersuissalluni, taanna inerniliivoq.

Allagaq Ataatsimiititaliamut suliaqartumut ingerlateqqinneqarpoq

Inatsisissatut siunnersuut apriilip 28-ani siullermeerneqarpoq, amerlanerussuteqartullu tapersersorpaat.

Partiit arlallit, ilaatigut Siumut, pisuttuarnissamut allagartaqarnissamik sillimmasiinissamillu piumasaqaateqarnissaq isumalluarfigaat.

- Alloriarneq pitsaasuuvoq. Kommuunit innuttaasunut qaninnerpaajupput, sumiiffiillu ilisimalluarlugit. Taamaammat tulluartuuvoq, takornariaqarnerup ineriartornerani kommuunit annertunerusumik akisussaaffeqalernissaat, Lars Poulsen, Siumut, oqarpoq.

Kikkulli tamarmik taama neriulluartiginngillat. Naleraq inatsisissatut siunnersuummi arlalinnik maluginiagaqarpoq. Takornarissat nalunaarsorneqarnissaat pillugu, allaffissornermik annertunerusumik, iluanaarfiunngitsumillu pilersitsisoqarnissaa, Juno Berthelsenip (N) oqaatigaa.

- Allaffissornikkut aaqqissuussinerit akisuut isertitaqarfiunngitsut, Kalaallit Nunaanni kukkussutigiuartakkatsinnut assersuutissaavoq.

Partiilli amerlanerussutillit siunnersuut aappassaaneerneqartinnagu Inuussutissarsiornermut Aatsitassanullu Ataatsimiititaliamut ingerlateqqinneqarnissaa isumaqatigiissutigaat, tamannalu ukiakkut ataatsimiinnissamut kinguartinneqarpoq.