Takunnittoq: Akilerneqarluni USA-mut ilanngunnissamut atsiornernik katersiniartoqartoq
Inuup, Amerikamiuusorineqartup, innuttaasoq 200.000 dollarinik neqeroorfigisimavaa, atsioruni nunarput USA-mut ilanngussinnaaneranik ilisimatillugu. Tamanna Facebookimi innuttaasup nammineq oqaluttuaraa. Innuttaasoq alla Sermitsiamut aamma taama misigisaqarsimalluni oqaluttuarpoq.
Foto: Sheldon Cooper/SIPA/Ritzau Scanpix
Nuummi innuttaasup allaatigisaqarnera Facebookikkut maanna siammarterneqarluarpoq.
Angut oqaluttuarpoq angutip Los Angelesimeersup, Cliffimik atillip, 200.000 dollarinik neqeroorfigisimagaani, allakkiamut atsiorsinnaaguni. Atsiornermi nunarput USA-mut atalernissaa akuerineqartussatut isigineqassasoq nassuiaanneqarsimavoq.
Innuttaasup neqeroorut itigartissimavaa, pisorlu politiinut nalunaarutigisimallugu.
Villy Olsvig, pingasunngornermi Nuummi “Cliffimik” aamma naapitsisimasoq, Sermitsiamit oqaloqatigineqarpoq. Villy Olsvig ulluni makkunani sivikitsumik Nuummiippoq, Katuallu eqqaani angut Amerikamiuusorisani ullumi naapippaa.
Takunnittoq: Eqqumiilluinnarpoq
Angutip Villy Olsvig qinnuigisimavaa HHE-p suup tungaaniinneranik tikkuusseqqullugu, Villy Olsvigillu ingiaqatigisimavaa. Aqqutaanili angut neqerooruteqariasaarpoq:
- Takusinnaasattut pappialarpaalunnik immersugassanik nassataqarpoq, immersuinermi atsiorfissaqarluni. Angutip oqaluttuuppaanga neqeroorummut akuersiguma aappaagu januaarimi 200.000 dollarinik akissarsiumaartunga.
Villy Olsvig nangilluni oqaluttuarpoq angutip oqaatigisimagaa ilaqutai aamma aningaasannakkumaartut, aningaasallu akileraaruteqarnavianngitsut. Neqeroorulli Villy Olsvigip qularnartoqartippaa:
- Upperiuminaappoq. Aningaasat suminngaanniissagamik, aamma kimik pissanerinik allaqqasoqanngiivippoq. Eqqumiittorujussuuvoq, Villy Olsvig oqarpoq.
Politiit oqaaseqarusunngillat
Sermitsiap Kalaallit Nunaanni Politiit attaveqarfigai. Pigaartut pisortaata nalunaarummik taama ittumik tigusaqarsimanertik uppernarsarsinnaanagu ilisimatitsipput, politiilli attaveqatigiinnermut immikkoortortaqarfianut innersuussilluni.
Sermitsiap attaveqatigiinnermut immikkoortortaqarfik attaveqarfigaa, sulili akissutisisimanani.
Pingaaruteqarpoq erseqqissassallugu Sermitsiap ilisimanngimmagu pineqartoq Cliff kinaanersoq sumilu sulinersoq, namminersortutut suliniuteqarnersoq allatigulluunniit allanik ingerlataqarnersoq.
Sermitsiami suliaq pillugu politiit oqaaseqartinnissaat sulissutigissavarput.
Sermitsiamit aammattaaq amerikamiut oqartussaasut pisumut ilisimasaqarnersut oqaaseqartinniarneqarput.
