Tasiilamukarniarluni ullut 15-it kinguaattoortoq: – Taama sivisutigisumik angerlarniarsaraluni stressernarpoq

Nuummi Qinngorpumi unnuisarfimmut apuukkatta Thomas Ørum Kristensenip angerlarsimaffimminullusooq tikilluaqquaatigut. Aammami angerlarsimaffiatut immaqa taaneqarsinnaavoq. Unnuisarfimmi tassani nulianilu, allat Tasiilamut aallarneq ajulersut peqatigalugit, sapaatip-akunneri marluk sinnerlugit najugaqarput.

Unnuisarfik najugarisaat sisamanik ineerartaqarpoq, ineeqqanilu taakkunani Thomasitulli kinguaattooqqasut allat najugaqarput.

- Allaanngilagut ilaqutariit, Thomas Ørum Kristensen illarlunilu oqarpoq.

Taanna nulianilu Danmarkimut juullisioriareerlutik januaarip aqqaneq-aappaanni Nuummut tikipput. Tasiilamut aqaguani ingerlaqqinnissaat taamani pilersaarutaagaluarpoq. Sunaaffali ulluni 15-ini kinguaattoornialeramik. Thomas marlunngornermi naapikkatsinni Tunumi silap qanoq innissaanik ilimasaarut malinnaaffigeqqissaarpaa.

- Immaqa, takussuarput, silassaq isigiutigalugu angerlarnissani pillugu taama oqarpoq.

Teknikki silalu angalanermik akimmisaartitsisut

62-inik ukiulik Thomas Ørum Kristensen namminersorluni inuussutissarsiortuuvoq, suliffeqarfik Tasiilaq Renovation piginnittuuffigalugu.

Taanna nulianilu Danmarkimut juullisioriarlutik decembarip 20-ani aallarput. Sapaatillu-akunneri marluk piumassuserinngisaminnik Nuummiikkamik utaqqikatalluinnaleqqapput.

- Oqarasuaatikkut suut tamaasa aqunniarsaralugit erloqinarpoq. Taama sivisutigisumik angerlarniarsaraluni stressernarsivoq, Thomas oqarpoq.

Qulimiguulik Kulusuup Tasiilallu akornanni angallassissutaasartoq teknikkikkut ajoquteqalersimasoq januaarip qulingani paasineqartoq Air Greenland allappoq. Qulimiguulimmik allamik Narsarsuarmiit tikisitsinissaq kinguninngua siunniunneqaraluarpoq, silali peqqutigalugu qulimiguulik anngussinnaasimanngilaq.

- Sila peqqutigalugu iluatsinngimmat allamik pilersaarusiorpugut. Taama pisoqarnerani qulimiguuliup kingoraartissaa Nuummut pereersimavoq, Air Greenland Sermitsiamut allappoq.

Sikualuit anorersuillu kinguaattoortitsisut

Kingoraartissaq Kulusumut januaarip 15-iani apuunneqaraluartoq Tasiilamut apuunniarnera iluatsinngilaq, sikualuimmi akimmisaartitsipput.

- Kingoraartissap Nuummiit Kulusumukaannissaa januaarip 15-iani iluatsimmat Tasiilamukaannissaa siunertaralugu angallataatilik oqaloqatigaarput. Sikualoqarnerali peqqutigalugu kingoraartissaq apuussinnaanngilarput.

Kingoraartissap SAR-helikopterimik apuunnissaa ulloq taanna iluatsippoq. Qulimiguulilli allamik ajoquteqartoq kingorna paasinarsimmat kingoraartissaq alla mekanikerilu alla pisariaqartinneqalerput.

Taakkua januaarip 17-iani angallanneqartussanngormata silarlulerpoq. SAR-helikopterillu Kangerlussuarmiit Tasiilaliarnissaa januaarip 20-ani aatsaat iluatsimmat qulimiguulik ulloq taanna iluarsineqarmat angallassineq aallarteqqissinnalerpoq. Silali aqaguani aamma ajorteqqimmat aamma suna tamarmi kipusooqqippoq.

Nuummiit Kulusumut timmisartuussinerit januaarip 27-ani aallarteqqipput.

- Angalasussat naammagittarsimaqisut ullumi aqagulu pingasunngornermi januaarip 28-ani ingerlaqqinnissaat naatsorsuutigaarput, Air Greenland Sermitsiamut marlunngornermi allappoq.

- Sooruna siulliunneqanngitsugut?

Thomasip nuliatalu juullisioriarnerat akikitsuinnaanngilaq, billetinummi siumut utimullu - Nuummi unnuineq ataaseq ilanngullugu - 39.768 koruuni atorpaat. Angalaneq Greenland Travel aqqutigalugu pisiaraat, sivisuumillu katersisimallutik.

- Uagut qaammaterpassuarni katersilluta flexbilletinut aningaasartuuteqangaatsiartugut sooruna siulliunneqanngitsugut? Air Greenlandip tamanna soqutiginngilluinnarpaa. Naluara sooq taamaannersoq, Thomas oqarpoq.

Angalasut billetiisa qanoq ittuuneri apeqqutaatillugit tulleriiaarneqartartut Air Greenlandip nassuiaatigaa.

Kinguaattooqatigiit Qinngorpumi Tuukkaq Apartmentsimi inissinneqarsimasut qanillilluinnarsimapput. Kulusuup Nuullu akornanni januaarip qulinganili timmisartuussisoqanngereersorlu timmisartuussinerit marlunngornermi aallarteqqimmata Thomasip ikinngutaa timmisartumut siullermut ilaavoq.

- Ikinngutitta ilaat allappoq issiaviit sisamat inoqannginnerarlugit. Sooruna? Thomas aperivoq.

Air Greenlandip pisoq ima nassuiaatigaa:

- Timmisartoq ullumi aallartoq ulikkaaqqavoq, takkutinngitsoortulli arlaqarmata issiaviit ilaat inoqanngillat.

Soormi immikkut ittumik timmisartuussisoqanngila?

Nuup Kulusuullu akornanni ulluni 17-ini timmisartuussisoqanngereersorlu timmisartuussineq aallarteqqippoq. Sila silaannakkut marlunngornermi angallavissaqqissimmat sooq immikkut ittumik timmisartuussisoqannginnera Thomasip eqqarsarnartoqartippaa.

- Tunulliunneqarluta arlalippassuariarluta misigisarparput, taanna oqarpoq.

Air Greenlandilli paasissutissiinera naapertorlugu immikkut ittumik marlunngornermi timmisartuussinissaq ajornarpoq.

- Angalanissamut pilersaaruteqareerpugut, timmisartullu atortussaareerlutigit. Ilaasunik assartukkanillu angallassinissamut ullumi pilersaarupput ulikkaaqqareerpoq. Dash-imik timmisartuusseqqissimagaluarutta timmisartuussinissanut pilersaaruteqareermat taakkua qulimiguulimmik ingerlateqqissinnaasimassanngikkaluarpugut, timmisartortitseqatigiit allapput.

Angerlarnissaminut piareeqqavoq

Thomas sapaatip-akunneri marluk sinnerlugit kinguaattooqareerluni angerlarnissaminut piareerluinnarpoq. Kulusumut timmisartoq siulleq pingasunngornermi aallareermat tullianut ilaasussaagami qilanaalereerpoq.

Nuummiingaatsiarnertillu kingumut qiviassaguniuk sorpassuit eqqaasinnaavai.

- Trump pititseqaaq, Nuummilu innaallagiaarutillarluni. Suut tamarmik piviusuunngitsutut misinnarput, Thomas oqarpoq.

Naak sapernoqatigiillutik ilaanni naammagittarniarneq misinnarsisaraluartoq  nuannisarniartarsimallutik oqaluttuaraa.

- Sumi ullormut nerissanerluta eqqartortaqaarput. Nerissutissaqarattalu januaarersuarmi imaallaammi sipaalaarpugut, Thomas oqarpoq kuffertinilu piareersarlugu aallartillugu.