Tassanngaannaq kilisaat immappoq – immannerullu pissutaa ukiut marluk qaangiuttut suli nassuiaatissaqanngilaq

Kilisaat raajarniut Lomur marsip 17-ani 2024-mi immanneranut kivineranillu pissutiviusoq paasineqarsimanngisaannarpoq.

Taama allassimavoq Imaatigut Ajutoornernut Misissueqqissaartartut Lomurip Sisimiut avataani umiuneranik misissuinermini, inuttat tamarmik piffissaq eqqorlugu annaanneqarnerannik kinguneqartumik, nalunaarusiaani.

Allaaserisaq tamanut marsip 17-ani 2026-mi saqqummiunneqarpoq, Royal Greenlandip kilisaataata umiuneranit ukiut marluk qaangiuttut.

- Paasissutissat misissuinermi pissarsiarineqartut tunngavigalugit suminngaanniit immassimanersoq paasineqarsinnaasimanngilaq, Imaani Ajutoortoqartillugu Misissueqqissaartartut nalunaarusiami naatsumi inerniliivoq:

- LOMUR 200 meterisut ititigisumi kivivoq, kivineratalu kingorna qaqinneqanngilaq, taamaattumik Imaani Ajutoornernik Misissueqqissaartartut umiarsuaq qanimut misissorsinnaanngilaat.

Nalunaarummi naatsumi allassimasut aallaavigalugit 2024-mi marsip 16-ianniit 17-iata tungaanut unnuap qeqqata missaani pisussat pissanganartut oqaluttuarineqarsinnaapput.

Lomur-imiit kalerrisaarut

Lomur-imi kalerrisaarut nalunaaqutaq 23.40 aallartimmat, maskiinalerisup kaffisorusaarnera tassanngaannaq kipineqarpoq.

Lomur Sisimiut kujataata kitaani 20 sømilit missaani 37 kilometerisut ungasitsigisumi taamani imaaniippoq, qulinik ilaasoqarluni.

Umiarsuup naqqani kalerrisaarut aallartippoq. Allatut oqaatigalugu annertusiartortumik umiarsuup naqqa immappoq. Maskinalerisut pisortaat tuaviinnaq maskiinaqarfimmukarpoq, tassanilu imeq sakkortuumik siornani aquanilu isaalereersimavoq.

Umiarsuup naqqani imaarsaatit inuttanit aallartinneqarput, maskiinalerisullu pisortaa imermut nilleqisumut seeqqummerluni søventilit qamippai. Immannerullu annikillisinnissaanik annerusumik sunniuteqanngilaq.

Umiarsuup naalagaata unnuap qeqqanngitsiartoq Lomur-imiit ajunaalernermik kalerrisaarivoq, umiarsuarmiiginnarnissaq ulorianarunnaartoq nalunaaquttap akunnera ataaseq qaangiummat naliliiffigaa.

Nalunaaqutaq 00.56 umiarsuarmik naalagaasup Aasiaat Radioanut nalunaarutigaa inuttat politiit angallataat Ilik, qujanartumik Sisimiunit aallartoq, utaqqeriarlugu umiatsiamut ikisimasut. Politiit minutsit 20-t missaanni qaangiuttut sumiiffimmut apissipput, inuttallu annallugit. Pisumi ajoqusertoqanngilaq.

Taamani innaallagiaaruppoq, umiarsuarmilu lomurimi pinartoqartillugu qaammaqqutit pisariaqartitsisoqartillugu atorneqartartut innaallagiaarunneranik kisimik ikumapput. Imeq tunisassiorfimmut, aquanullu taamaasinerani killissimavoq.

Taamaakkaluartoq Lomur suli puttavoq, aatsaat marsip 17-ianni nalunaaqutaq 03.51 kivivoq. Sakkutuut imarsiortut taamani sumiiffimmiipput. Taamaattumillu assi ataani takuneqarsinnaasoq assilineqarpoq.

Iliuuseqapallanneq pingaarutilik

Ajutoortoqarneranik misissueqqissaartartut paasissutissat pineqarsinnaasut, soorlu titartakkat, assit inuttallu oqaluttuarneri atorlugit qaartoqarsimasinnaanera misissorpaat.

Ilaatigut umiarsuup timitaata ajoqusersimaneranik imaluunniit aquutaata sarpiisa eqqaanni ernartoqarsimaneranik isumaqartoqarpoq.

Aammattaaq misissueqqissaartartut immap imermik motoorinik nillusaataata allanullu atortartoq umiarsuarmut ernarluni aserorsimasinnaanera misissorsimavaa. Taamaattoqarsinnaanera maskiinalerisut pisortaata søventilit matuniarsimanerannik misiliisimagaluarnera aallaavigalugu isumaliuutersuuteqartoqarpoq.

Lomurilli sisimiut avataani immassimaneranut tamanna pissutaanersoq iluamik oqaatigineqarsinnaanngilaq.

- Inuttalli ikiorneqartariaqarnerminnik siusissukkut kalerrisaarisimanerat ajunaalernerup nalaani isumannaatsuunissamut pingaaruteqarluinnarpoq, Imaani Ajutoortoqartillugu Misissueqqissaartartut naqissusiipput.

- Inuttat siusissukkut paasivaat pissutsit ilungersunartuusut, umiarsuullu suli isumannaatsuugallarnerani ikioqqullutik saaffiginnipput. Taamaalilluni annaassiniaanissamut piareersarnissaq politiillu umiatsiaata apuuffissamut apuunnissaa piffissaqarfigineqarput.